2 persona të tjerë janë arrestuar për dhunë para Kuvendit dhe sulmet ndaj policisë në ditën e nëntë të protestave në Shkup kundër propozimit francez.
Sipas njoftimit të ministrisë së brendshme të arrestuarit janë të moshës 18 dhe 32 vjeç, ndërsa ndaj tyre është ngritur edhe padi penale për veprën “pjesëmarrje në turmë që do të kryejë krim”.
Protestat do të vijojnë dhe ditën e sotme por nuk do të mbahen në orë 19:00 si zakonisht por opozita e vendit bëri thirrje që të mbahen në mesditë, pikërisht në kohën kur Kuvendi do të shqyrtojë propozimin francez dhe kryetarja e Komisionit Evropian, Ursula Von Der Leyenn do të ju drejtohet deputetëve.
Ministri i Brendshëm, Oliver Spasovski siguroi se do të ndërmerren të gjitha masat e nevojshme të sigurisë për të evituar incidente dhe përplasje.
“Po bëhen analiza, po mbledhim të gjitha të dhënat dhe informacionet për ndodhi të mundshme gjatë mbajtjes së seancës. MPB do t’i ndërmerr të gjitha masat e nevojshme të sigurimit edhe të deputetëve edhe të shtëpisë ligjvënëse”- deklaroi Spasovski.
Spasovski tha se ata kanë të dhëna se çfarë pritet të ndodhë ndaj dhe po punojnë në përgatitjen e një plani më të mirë operativ mbrojtës.
“Kemi informacione dhe të dhëna për atë se çfarë përgatisin, në çfarë mënyre organizohen grupe të caktuara, ndryshimin e strategjive të tyre e të tjera, por të gjitha këto të dhëna dhe informacione analizohen dhe mbi bazën e saj përgatitet plani i cili duhet të garanton siguri për qytetarë”- shtoi ai.
Protestat hyn sot në ditën e dhjetë qëkur në Maqedoninë e Veriut erdhi propozimi francez për zgjidhjen e ngërçit me Bullgarisë e cila ka bllokuar dhe rrugëtimin e saj dhe të Shqipërisë drejt integrimit në Bashkimin Europian. Ato janë thirrur nga opozita, e kryesuar nga VMRO-DPMNE-ja e cila ka shprehur hapur qëndrimin kundër këtij propozimi pasi sipas saj përdhos gjuhën dhe identitetin maqedonas. Në 9 ditë protesta janë lënduar 54 policë.
