Torino nuk heq dorë nga Marash Kumbulla. “Demat” e konsiderojnë shqiptarin si idealin për të forcuar mbrojtjen dhe për të zëvendësuar Bremer, i destinuar për t’u larguar në merkaton e kësaj vere. Negociatat me Romën nuk kanë nisur ende, por do të fillojnë vetëm pasi braziliani të jetë shitur.
Për të arritur te Kumbulla, ideja e Torinos është që t’i kërkojë verdhekuqve mbrojtësin në formë huazimi, por me opsion blerjeje në fund të sezonit të ardhshëm. Vetë futbollisti nuk ka lënë të kuptohet se dëshiron të largohet nga kryeqyteti në këtë merkato verore, megjithatë mungesa e hapësirave dhe qëndrimi si zëvendësues i Smolling e Ibanez mund ta detyrojë që të zgjedhë një tjetër skuadër për të vijuar karrierën.
22-vjeçari ka humbur vendin si titullarë nën urdhrat e trajnerit Murinjo, teksa në miqësoren me Sunderland qëndroi në fushë për 85 minuta, duke bërë një paraqitje mbi mesataren. Përpos Torinos, interes sporadik për Kumbullën ka shfaqur edhe Interi, i cili me shitjen e Skriniar te Pari Së Zhërme mund të hedh sytë nga shqiptari, pavarësisht se zgjedhja e parë e zikaltërve mbetet Bremer.
