Ish-ministri Genc Pollo risjell në vëmendje kritikat e Dhomës Amerikane të Tregtisë për projektligjin qeveritar të amnistisë fiskale.
Në një postim në FB, ai shkruan se pas opozitës, shoqërisë civile e Bashkimit Europian edhe Dhoma Amerikane e Tregtisë e konsideron p/ligjin “për amnisti fiskale” jo thjesht si problem por si dëm që qeveria Rama i bën Shqipërisë.
Ka mbetur pa u shprehur edhe dikush që zakonisht flet apo hesht kur nuk lipset, por kjo nuk ka rëndësi, shton ai.
“Është shumë pozitive që ka një front të brendshëm e ndërkombëtar i cili qartazi kundërshton projekt-ligjin e mafies. Zmbrapsja e kësaj nisme recidiviste është detyrë primare e Partisë Demokratike. Pa harruar të tjera zullume të qeverisë”, e mbyll reagimin Pollo.
