Sali Berisha në fjalën e tij në Kuvend përmendi skandalin e inceneratorëve duke theksuar se shteti shqiptar i paguan 80 mijë euro çdo ditë vetëm inceneratorit të Tiranës edhe pse pronarët e kompanisë janë në kërkim.
Ish-kryeministri përmendi edhe rrugën Ibë-Farkë, e cila sipas tij ka kushtaur 210 milion euro.
“Çfarë ndodh me këtë drejtësi? A e dini ju që në aferën e djegësve Erion Veliaj vazhdon sikur s’ka ndodhur gjë dhe çdo ditë disbursohen nga paratë tuaja 80 mijë euro për këta hajdutë? Çfarë bën kjo drejtësi? Cila drejtësi është kjo? A e dini ju se 7 km rrugë nga Iba në Farkë kanë kushtuar 210 milionë euro? Ka kushtuar 30 milionë euro km. Ka shkuar 40% më shtrenjtë se kilometri në tunelin e Kalimashit. 100% më shtrenjtë se km në tunelin e Krrabës. Hetojnë këta…Prandaj këta u thurin lavde këtu dhe i duartrokasin”, tha Berisha.
Ahmetaj i përgjigjet Berishës
Zëvendëskryeministri Arben Ahmetaj nga foltorja e Kuvendit ka sulmuar ish-kryeministrin, Sali Berisha, për të cilin tha se e ka humbur të drejtën për të qenë në parlament.
Sipas Ahmetajt, Sali Berisha ka vrarë më shumë se pandemia, ndërsa i kujtoi atij Gërdecin dhe vitin e mbrapshtë 1997.
Po ashtu, Ahmetaj ironizoi edhe kolegët e tij opozitarë, duke thënë se disa prej tyre e duartrokasin Berishën dhe disa të tjerë e përqeshin nën buzë.
“Vjen flet ai që ka vrarë më shumë se pandemia, që nga Gërdeci, 97, mbajtësi i vulës së thyerjes së embargos në 94 vjen flet këtu për drejtësi dhe për pandemi. Ai e ka mundur pandeminë me vdekjet dhe prapë guxon e vjen këtu dhe ndonjë nga këta, dikush e përqesh në buzë, dikush e duartroket. Por e vërteta duhet përmendur, ka vrarë më shumë se pandemia, e ka humbur të drejtën ai njeri të jetë në Parlament, lërë me të flasë. Nuk dua të merrem me një njeri që nuk ekziston”, tha Ahmetaj në Kuvend.
