Është zbardhur përmbajtja e dosjes së rëndë, në lidhje me vrasjen e Fatime Sulit, nga fqinji i saj Fetah Marra në lagjen “Havaleas” në fshatin Kozare mbrëmjen e 20 janarit.
58-vjeçari ka deklaruar në polici që është konfliktuar me gruan për shkak të një borxhi të pakthyer që ajo i kishte, dhe gjatë debatit ajo e ka kërcënuar me një gur se do e vriste. Marra ka deklaruar se fillimisht e ka goditur me pëllëmbë në fytyrë, ndërsa më pas me parakrahun e tij e ka kapur nga mbrapa duke ia vendosur në fyt dhe e ka mbajtur shtrënguar deri sa ajo ka vdekur.
Ai e ka tërhequr zvarë deri në kanal, ku pasi e hodhi e mbuloi me gjethe. 63-vjeçarja Fatime Suli u gjet e vdekur në kanal gjysmë e zhveshur pasi familjarët e saj e kishin kërkuar prej disa orësh. Autori gjithsesi nuk ka treguar se përse ajo ishte e zhveshur nga mesi e poshtë.
“Ditën e djeshme, rreth orës 10:00 paradite doli me bagëtitë te tokat e tij në fshatin Havaleas. Teksa kullosja dhitë pa në një shesh afër një kulle nafte se ishte dhe shtetasja Fatime Suli. Fatimja po mblidhte penj që përdoren për të lidhur domatet e serave. Po ashtu afër Fatimes ishte dhe një karroce dore që ajo e mbanë për të transportuar penjtë që mblidhte dhe t’i çonte në shtëpi.
E pyeti se si ishte por ajo nuk i ktheu përgjigje. Më pas i kërkoi që t’i kthente përgjigje. Ajo më pas i ka thënë çfarë do. Pas këtyre fjalëve i ka thënë që duhej t’i jepte lekët që i kishte, por ajo i ka thënë se nuk ia jepte. Më pas ajo i ka thënë se përse e përgojonte, sikur shkonte me burrat e tjerë. Shtetasi Fetah Mara i ka thënë që nuk e ka përgojuar, por i ka kërkuar që t’i kthente ato që i kishte. Por ajo ka refuzuar duke i thënë që nuk kishte për t’i dhënë.
Pasi i ka marrë penjtë me forcë nga dora i ka thënë ik merr lekët. Penjtë ia ka hedhur në tokë dhe ndërkohë Fatimja i ka marrë dhe i ka thënë që të largohej. Më pas ajo ka marrë një plis dheu dhe e ka goditur në shpatullën e majtë.
Më pas ka marrë një gur dhe e ka kërcënuar duke i thënë që do ta godiste. Ia ka marrë gurin nga dora me forcë dhe e ka hedhur në tokë. Ajo përsëri i ka marrë dhe i ka thënë që do ta godiste. Në këtë kohë e ka qëlluar me pëllëmbë në fytyrë, por Fatimja ka marrë përsëri gurin dhe i ka thënë që do e godiste.
Në këtë kohë ia ka rrëmbyer gurin nga dora dhe me parakrahun e tij e ka kapur nga mbrapa duke ia vendosur në fyt dhe po e mbante të shtrënguar. Ajo i ka thënë që do e lëshonte, pasi do të njoftonte policinë. Duke qenë se ishte i dehur, deklaron shtetasi Fetah Marra, nuk mban mend se çfarë ka ndodhur më pas, por papritur ka parë që Fatimja u këput që në këmbë.
Ajo u bë dyllë e verdhë dhe e vuri re që ndërroi jetë. Më pas e ka tërhequr zvarrë nga shpatullat dhe e ka e vendosur te një ulluk i vogël, jo shumë larg nga vendi që e mbyti. Aty e ka mbuluar me ca mbeturina domatesh të shkulura dhe copa penjsh që gjeti aty rastësisht. “, thuhet në dosjen hetimore.
