Doktori i njohur Ilir Alimehmeti, nga studio e emisionit “Frontline” në News24, tha se shpreson që javën e ardhshme të ketë një stabilizim të situatës së shifrave të Covid në Shqipëri, që më pas të ulen edhe rastet e reja ditore.
Ai tha se situata është e tillë, kemi kurbën që pëson një rritje, pastaj është stabilizimi dhe më pas ulja e rasteve, gjë që ka ndodhur në shumë prej vendeve europiane, me të cilat ne jemi dy javë me vonesë.
Alimehmeti u shpreh se pavarësisht që kemi një shtim të rasteve të infektuara, me variantin Omicron, situata është nën kontroll dhe rastet e hospitalizuara janë në nivele të ulëta.
Sipas tij, Omicron në krahasim me mutacionet e tjera është më infektues, por vdekshmëria e tij është shumë e ulët.
“Kemi raste të reja, por situata spitalore është stabël. E rëndësishme është numri spitalor. Nuk ka panik, por duhet të kuptojmë kush janë njerëzit që po sëmuren dhe përse disa po bëhen më rëndë. Analiza tani duhet bërë tek pacienti”, u shpreh ai.
“Omicron në krahasim me deltën është më i transmetueshëm, por risku për të çuar në spital është 80% më i vogël se Delta. Tani ka një digë imuniteti kolektiv. Shumë veta janë vaksinuar. Të gjithë shkojnë tek ky muri i këtij imuniteti. Këto bëjnë që spitalet të kenë shifra më të ulëta”, deklaroi mjeku.
Ai tha se është e vështirë për të thënë se në çfarë niveli është infektimi në Shqipëri, pasi nuk ka testime të mjaftueshme. “Kemi një pozitivitet 46 %, por kemi njëherazi edhe atë shprehjen: kaq duam të zbulojmë”, tha Alimehmeti, referuar numrit të pakët të testimeve që realizohen.
