Esat Mala është lojtar i lirë. Mesfushori ka ndërprerë marrëveshjen me konsensus me klubin turk të Girensuspor. Klubi turk s’e ka pasur në plane 23-vjeçarin dhe pas përfundimit të sezonit, janë dakordësuar për të ndarë rrugët. Edhe pse edicioni që mbylli me Partizanin ishte relativisht i mirë turqit s’i kanë preferuar shërbimet e tij.
Anësori i djathtë tashmë është shndërruar në opsion për të kuqtë, të cilët kanë pasur bisedime, por ende s’i kanë bërë një ofertë. Shtypi i shkruar raporton se mënyra se si Mala u largua nga Partizani duket se ka krijuar krisje mes palëve. Stafi drejtues dhe teknik kanë pritur që ai të shprehë dëshirën për të kontribuar edhe në Kupat e Europës.
Por, një gjë e tillë nuk ndodhi dhe kësisoj marrëdhëniet e mira janë thyer. Pritet me interes të shihet se cilat do të jenë të rejat për të ardhmen e Malës, të cilit dëshira për t’u kthyer te kryeqytetasit s’i mungon. Por, fillimisht pret ofertën e tyre në mënyrë që të vendosë.
