Pothuajse dy javë pas vrasjes të një të riu në Gjermani, policia gjermane ka arrestuar të riun shqiptar Fisnik Hoxha.
Shqiptari u arrestua nga forcat speciale në Gelsenkirchen, pasi kërkohej prej 2 javësh për vrasjen e 31-vjeçarit turk në Kiel.
Policia dhe Prokuroria e Kielit kanë thënë se 23-vjecari u arrestua nga njësitë speciale në Gelsenkirchen sot pasdite, shkruajnë mediat gjermane.
I riu nga Shqipëria nuk ka bërë rezistencë ndaj arrestimit, ndërsa pritet që të dalë përpara gjyqit.
Pasi vrau turkun, ai u shpall në kërkim ndërkombëtar, për shkak se autoritetet gjermane kishin dyshime se mund të arratisej drejt Shqipërisë.
Policia gjermane nuk ka dhënë detaje se ku është fshehur i riu në dy javët e tij të arratisë.
Si ndodhi ngjarja dy javë më parë
Ngjarja ndodhi mbrëmjen e 28 qershorit pak para mesnate në rrugën “Gustav-Schatz-Hof” në qytetin e Kielit, ku shqiptari ka qëlluar disa herë mbi 31-vjeçarin turk, i cili ndërroi jetë në spital pavarësisht përpjekjeve të menjëhershme të mjekëve për ta shpëtuar.
Pas ngjarjes, i riu shqiptar u larguar nga skena e krimit në drejtim të paditur. Ndërsa autoritetet gjermane e shpallën në kërkim duke ofruar një shpërblim prej 3 mijë euro për këdo që jep informacion. Ndërsa autori Fisnik Hoxha u arrestua pasditen e sotme nga forcat speciale gjermane.
