Zgjedhja e universitetit është një nga dilemat e të rinjve pas përfundimit të gjimnazit.
Rreth 1/3 e maturantëve këtë vit kanë shprehur dëshirën të studiojnë jashtë Shqipërisë ende pa dhënë provimet e maturës.
“Formularin A1 e kanë plotësuar 11 mijë maturantë, gjatë plotësimit kanë zgjedhur opsionin që duan të studiojnë jashtë vendit. Pak a shumë dhe vitin e kaluar ka qene e njëjta prirje. Në gjykimin tim kjo nuk është shifra reale e maturantëve që duan të vijojnë studimet jashtë vendit pasi një pjesë e madhe e tyre e zgjedhin për efekt që ta kenë 2-3 javë më para diplomën.”
Drejtori i Drejtorisë së Vlerësimit në Qendrën e Shërbimeve Arsimore Agim Aliaj i referohet aplikimeve në universitetet jashtë vendit të një viti më parë.
Ky proces vjen pas atij të legalizimit të dokumenteve të shkollës së mesme që ka nisur prej 1 korrikut.
“Kryejmë procesin tjetër të legalizimit të dokumenteve të përfundimit të arsimit të mesëm të lartë, ku përfshihet diploma e maturës shtetërore dhe certifikata e notave të shkollës së mesme dhe të dy këto dokumente dëshmojnë përfundimin me sukses të shkollës. Referuar të dhënave që ne disponojmë për sa i përket numrit të aplikimeve variojnë rreth 3 mijë aplikime.”
Ndër universitetet më të pëlqyera nga të rinjtë janë ato gjermane, britanike, italiane dhe turke.
Këtë vit morën diplomën e shkollës së mesme në vendin tonë rreth 29 mijë maturantë.
