Kati i parë i spitalit të Fierit u përfshi nga flakët paraditen e sotme.
Ngjarja shkaktoi panik tek pacientët dhe mjekët e spitalit.
Fatmirësisht nuk u regjistrua asnjë viktimë apo i plagosur, por vetëm dëme materiale.
Zjarri ra në dhomën e laboratorit ku ndodhet dhe lavatriçja e larjes së filmave.
Një prej mjekëve të këtij spitali ka treguar edhe shkaqet e zjarrit.
Duke folur për mediat mjeku imazherist Aristotel Kusta tregoi se fillimisht kishte bërë një masë lavatriçja e larjes së filmave dhe më pas është përfshirë nga flakët i gjithë laboratori.
“Ajo që ka marrë flakë është lavatriçja e larjes së filmave. Ka bërë masë dhe aty ka filluar flaka. Më pas ka marrë zjarr gjithë laboratori. Nuk e di për kosto, s’mund të flas, mori flakë rreth orës 10:00. Nuk kishte njerëz, është laboratori që nuk ka lidhje me pacientët. Bëri masë dhe doli flakë, aty kishte dhe dollapë, rafte të larjes së filmave. Janë dëmtuar materialet. Nga masa elektrike mendoj. Të gjitha pajisjet kanë dalë jashtë funksionimit”, tha mjeku.
