KPA ka konfirmuar sot në detyrë me një vendim të sajin gjyqtarin Gerd Hoxha. Vendimi në fjalë ka sjellë një reagim të fortë dhe të ashpër të përfaqësuesit të Operacionit Ndërkombëtar të Monitorimit (ONM), Theo Jacobs, i cili pas shpalljes tha se procesi i vetting dhe qytetarët shqiptarë presin më shumë dhe më mirë se ky vendim i trupës.
Nga video e mëposhtme shihet qartë toni i ashpër që Jacobs përdor ndaj trupës së KPA e përbërë nga Rezarta Schuetz kryesuese, Albana Shtylla relatore, Ina Rama, Natasha Mulaj, Sokol Çomo anëtarë, por edhe padurimin e anëtarëve të trupës për t´u larguar nga salla.
Jacobs përmes deklaratës së tij e ka konsideruar vendimin me hije që ngrenë dyshime të forta mbi trupën e KPA, çka përbën një ndër deklaratat e para të forta dhe publike që një përfaqësues i ONM hedh mbi anëtarët e trupave të Vetting, pavarësisht përplasjeve që ka pasur edhe më parë mbi vendimmarrjet, qoftë nga KPK ashtu edhe nga KPA.
“Në emër të vëzhguesve ndërkombëtarë, dëshiroj të theksoj se ne nuk jemi plotësisht dakord me këtë vendim, jo vetëm për përmbajtjen, por edhe për procesin e vendimmarrjes.
Më vjen thellësisht keq që ky vendim po hedh hije mbi imazhin e fortë që kjo dhomë mundi të mbajë përmes vendimeve të guximshme dhe të vështira.
Drejtësia është diçka që shërbehet kur një vendim bazohet në fakte, jo kur faktet përshtaten me rezultatin e dëshiruar.
Reforma në drejtësi, procesi i vetingut, kjo dhomë e posaçme apeli dhe qytetarët shqiptarë meritojnë më shumë dhe më mirë se ky vendim”, u shpreh Jacobs.
