Një shifër e pazakontë golash të shënuar në ligën e dytë të kampionatit në Sierra Leone ka bërë që Federata e këtij shteti të hapë një hetim për trukim të ndeshjeve. Fjala është për skuadrën e Kenema që në dy sfida shënuan plot 187 gola.
Gjithsesi, pas nisjes së hetimeve, rezultatet e dyja ndeshjeve janë bërë të pavlefshme në pritje të një vendimi nga organet kompetente. Presidenti i Federatës së Sierra Leones, Thomas Daddy Brima theksoi në një intervistë për BBC Sport Africa se nuk mund të qëndrojnë duarkryq para një situate të tillë.
“Nuk mund të qëndrojmë dhe thjesht të shohim këtë situatë të turpshme, duhet ta ndëshkojmë atë. Do të nisim një hetim të menjëhershëm dhe t’i vendosim para përgjegjësisë të gjithë autorët që kanë përgjegjësi për këtë mediokritet”, u shpreh presidenti Thomas Daddy Brima.
