Rikonstruksioni i rrugës Uji i ftohtë Orikum dhe ndërtimi i dy by passe-ve po kthehet në një mision të vështirë për tu realizuar. Shkak nuk është sezoni i verës, por procedurat e ndjekura nga Fondi Shqiptar i Zhvillimit.
Të paktën ky është një nga konkluzionet e arritura prej Kontrollit të Lartë të shtetit pas verifikimeve në terren të situatës.
Një nga problematikat është mungesa e konsultimit publik. Sipas dokumentit është pretenduar të jenë realizuar dëgjesa publike, por në listën e takimit të zhvilluar në bashkinë e Vlorës janë 14 persona të institucioneve dhe vetëm dy nga fusha e biznesit.
Madje nuk janë kryer publikimet në regjistrin publik dhe në programin e transparencës.
Në letërkëmbim edhe vetë FSHZH pretendon realizimin e konsultimit edhe pse nuk ka asnjë material, ndaj KLSH shprehet se “gjithsesi nuk mund të klasifikohen si dëgjesa publike”.
Banorët i kanë dërguar shkresë dhe ankesë të gjithë institucioneve, por ato nuk janë marrë parasysh.
Vetëm më pas palët janë detyruar të ndryshojnë projektin, por për të ende nuk ka një leje ndërtimi dhe nuk është dorëzuar as sheshi i ndërtimit çka ka bërë që të mos nisin as punimet në terren.
Për rrjedhojë, thuhet në dokumentin e auditimit, rezulton se prej mungesës së ndjekjes në mënyrën e duhur të hapave për realizimin e projektit nga ana e FSHZH, konkretisht të atyre në drejtim të bashkëpunimit me Bashkinë Vlorë për identifikimin e saktë dhe në kohë të gjurmës së projektit janë shkaktuar vonesa në realizimin e projektit
Pas lidhjes së kontratës nga ana e kontraktorit është paraqitur për pagesë vetëm një siguacion pjesor i gushtit të vitit 2021 i cili i takon pagesës paradhënie 1,4 milionë dollarë nga e cila i është paguar OE-së vetëm si TVSH në masën 289 mijë dollarë.
Në këtë situatë ekspozohet ndjeshëm Fondi i zhvillimit ndaj riskut të paraqitjes së ankesave nga ana e Kontraktorit për vonesa në kryerjen e pagesës sipas kushteve të kontratës.
/Ora News/
