Jo vetëm në 7 korrik, por edhe në 4 korrik, Kryeministri Edi Rama do të përballet me një protestë. Pasditen e 4 korrikut, janë gazetarët që do të protestojnë përpara Kryeministrisë ndaj Edi Ramës, i cili po instalon në vend atë që e quan “riedukim” duke penguar gazetarët me muaj të mos ndjekin konferencat e tij për mediat vetëm se i duken pyetjet e çuditshme ose nuk i pëlqejnë.
Protesta, e cila do të zhvillohet në orën 19:00 të datës 4 korrik, është thirrur përmes rrjeteve sociale nga gazetarët dhe reporterët, të cilvt ftojnë çdo qytetar që ti bashkohet për të mbrojtur lirinë e mediave.
“Më shumë e rrezikshme sesa censura është autocensura që po prodhojnë veprimet e Kryeministrit për të riedukuar gazetarët, për shkak se ata bëjnë pyetje të vështira, të sikletshme dhe të padrejta.
Kjo censurë, që më pas sjell autocensurën e gazetarit, bën që për tre muaj, gazetari të mos bëj asnjë pyetje drejt kreut të qeverisë. Ç’ndodh? Pas tre muajsh bllokadë, gazetari edhe nëse ka një pyetje të mirë, e të sikletshme për qeverinë se bën, me frikën e riedukimit – internimit të tij, për tre muaj të tjerë.
Prandaj duhet të kundërshtojmë fort të gjithë bashkë, këtë metodë komunistë të Ramës, bërë ndaj medias. Ndryshe ky standard, mund të aplikohet nga ministra, drejtora, deputetë etj, në momentin që u bëhet një pyetje e vështirë.
Për këtë arsye, ditën e hënë, 4 korrik, ora 19.00 protestojmë përpara Kryeministrisë, sepse RIEDUKIMI SOT, ËSHTË INTERNIMI DJE…
Kushdo mund të na bashkohet, kjo nuk është vetëm lufta jonë!”, thuhet në njoftimin e bërë publik në rrjetet sociale.
