Reperi kosovar, Antwa, në një lidhje të drejtpërdrejtë me “Shqipëria Live”, zbuloi se prej katër vitesh nuk ka takuar fëmijët e tij pasi ish-bashkëshortja nuk e lejon që t’u afrohet atyre dhe se u ka folur keq për të.
Ai tregoi gjithashtu kur ka nisur drogën dhe është bërë i varur ndaj tij. Reperi ka dhënë edhe mesazhe të forta për të rinjtë që nisin drogën për të harruar problemet. Sipas tij, droga vetëm ti shton.
“Drogën e nisa pasi u ndava. Nuk isha mësuar me të. Si i ri kam kërkuar ngushëllim në diçka dhe nisa në përdorimin e narkotikëve. Kjo pas ndarjes. Se nuk mund të jesh prind i mirë nëse konsumon drogë. Kokainë kam përdorur. Kam menduar që të humbas mendjen, të harroj problemet. Por u them të rinjve se nëse duan të bëhen përdorues të narkotikëve, është mënyra më e keqe për të harruar problemet, veç ua shtojnë.
Kokaina si lëndë narkotike është e shtrenjtë e duhet të fitosh për ta blerë. E pastaj bëhesh i varur. Pastaj duhet me vjedh, me bërë gjithçka për të blerë kokainën. Mund të humbi familje, shoqëri e gjithçka pas përdorimit të drogës. Aty nisin sherret, therjet, plagosjet të gjitha gjërat. Kam pasur shumë probleme. Jam bërë shumë agresiv dhe kam bërë shumë probleme. Ti nuk ke faj për diçka që më ka ndodhur mua, e unë të afrohem e të them ti duhet të më dëgjosh mua, po ti s’ke pse të më dëgjosh mua.
Kam qenë 2 vite konsumues i drogës. Më kanë humbur shumë gjëra. Jam artist, reper, e mund të kisha qenë shumë lart, por më ka humbur orientimin e jetës. Është momenti kur mbyllesh në një dhomë e pyet “ku jam, çfarë po bëj”, se nuk kam qenë kështu. Pse duhet ta bëj? Kam fëmijë, kam familje. I kam thënë vetes “është e tepërt, boll më”. Nuk më ka ndihmuar askush. Mjeku ma i mirë i jetës tënde është vetja jote. Ti je psikologu ma i mirë i vetes tënde”, tha ai.
Reperi deklaroi gjithashtu se ka menduar edhe të vrasë veten, por besimi në Zot, fëmijët dhe familja, kanë bërë që ai të largojë këto mendime.
