Komisioni i Pavarur i Kualifikimit njoftoi sot vendimin e shkarkimit nga detyra të prokurorit të Prokurorisë së Shkodrës, Astrit Halilaj.
Trupi gjykues përbëhej nga Genta Tafa Bungo kryesuese, Lulzim Hamitaj relator dhe Roland Ilia anëtar.
Prokurori i Shkodrës, Astrit Halilaj u përball të martën më 28 qershor me Komisionin e Pavarur të Kualifikimit, KPK, kur gjatë seancës dëgjimore dha shpjegime për mënyrën krijimit dhe përfitimit të disa pasurive të paluajtshme, burimet financiare dhe balancat negative të konstatuara gjatë hetimit administrativ. Ndërkohë, Halilaj u vlerësua pozitivisht për pastërtinë e figurës, si dhe nuk u evidentuan probleme në kriterin profesional.
Astrit Halilaj e ka filluar karrierën si oficer i policisë gjyqësore në vitin 1993 dhe përgjatë dy dekadave ka mbajtur pozicione drejtuese në Policinë e Shtetit. Prej vitit 2016, Halilaj ka punuar si prokuror pranë Prokurorisë së Rrethit Gjyqësor Shkodër.
