Juventus është në prag të një revolucioni të vërtetë në repartin e avancuar. Pas largimit të Paulo Dybala si futbollist i lirë, dy lojtarë të tjerë me tepër peshë i kanë dhënë fund aventurës si bardhezi. Bëhet fjalë për Alvaro Morata dhe Federico Bernardeschi.
Spanjolli do rikthehet te Atletico Madrid pas huazimit në Torino. Sulmuesi tashmë 29-vjeçar pritet të qëndrojë në kryeqytetin spanjoll në sezonin e ri, por nuk përjashtohet fakti që të firmosë diku tjetër, me disa klube të Premier League angleze që kanë shfaqur interes për shërbimet e tij. Më e dhimbshme duket ndarja me Bernardeschi.
Italiani nuk ka arritur të bindë drejtuesit për t’i ofruar zgjatje të marrëveshjes, duke u larguar nga Torino si lojtar i lirë. Anësori është penalizuar jo pak nga dëmtimet në eksperiencën te Juventusi, çka duket se ka ndikuar te vendimi për të lënë fanellën bardhezi.
E ardhmja e tij pritet të jetë sërish në Seria A italiane. Për 28-vjeçarin ka interes nga Napoli dhe Roma, me verdhekuqtë që e konsiderojnë si pasuesin e Nicolo Zagnolo, gjithmonë nëse ky i fundit do largohet në merkaton e kësaj vere.
