Arrestohet zyrtari i katërt i dyshuar i përfshirë në dosjen e tjetërsimit të lagunës në Kune Vain. Polici njoftoi se është arrestuar sot kryeplaku i fshatit Grykë Lume në Tale, Pjetër Luka i cili ishte i shpallur në kërkim.
Për të Gjykata e Shkallës së Parë Lezhë kishte caktuar masën e sigurisë “Arrest në burg”, për veprën penale “Falsifikimi i dokumenteve”.
“Ky shtetas, dyshohet se në periudha të ndryshme kohore, ka përpiluar dhe lëshuar dokumente të falsifikuara, me qëllim tjetërsimin e kësaj prone, në favor të të tretëve. Gjatë kontrollit në banesën e tij, shërbimet e Policisë kanë gjetur dokumente të ndryshme të dyshuara të falsifikuara (me të dhëna të rreme)” informoi sot policia.
Vijon operacioni, për identifikimin dhe kapjen e personave të tjerë të përfshirë në këtë veprimtari kriminale, shtuan të njëjtat burime.
Në kuadër të këtij operacioni më 3 qershor 2022 u ndaluan drejtori i Zonave të Mbrojtura në Lezhe Pjeter Toni dhe 3 inspektorë të këtij institucioni.
Arrestimet u kryen në vijim të operacionit “Tjetërsimi i Lagunës”, i zhvilluar rreth 1 muaj më parë, për goditjen e veprimtarive të paligjshme që po zhvilloheshin në zonën e mbrojtur të Kune Vain, në të cilat u përfshinë 4 funksionarë publikë, 3 prej të cilëve u ndaluan, ndërsa 1 tjetër (Pjeter Luka) u shpall në kërkim.`
