Partia Demokratike, grupet e interesit dhe shoqëria civile, kanë thirrur një protestë në 7 korrik, ora 19:00 para godinës së Kryeministrisë.
Në një intervistë për “Ora News”, deputeti Edmond Spaho tha se kanë kërkuar që shoqëria civile, si dhe partitë opozitare t’i bashkohen protestës.
“Vendi është në një krizë të plotë të të gjitha fushave, dhe kjo duket nga fakti që gjatë viteve të fundit 240 mijë veta janë larguar nga Shqipëria. Kemi kërkuar që shoqëria civile të jetë e kësaj proteste, kemi kërkuar që edhe elita t’i bashkohet protestës si dhe ato parti opozitare që e shohin me shqetësim situatën në vendin tonë”, tha ai.
Spaho u shpreh se protestën e sheh si një test për shoqërinë shqiptare, ndërsa theksoi se synojnë të kenë një protestë larg nga ajo protesta e klisheve duke i referuar protestave që organizonte Lulzim Basha.
“Protestën nuk e shoh si test për PD por për shoqërinë shqiptare. Ne do u dalim qytetarëve për zot dhe do kryejmë detyrat tona si opozitë. Së pari ne do të përpiqemi që të ngacmojmë genin e reagimit të qytetarëve të Tiranës.
Ne synojmë që të kemi një protestë larg nga ajo e klisheve të cilat jemi mësuar të shikojmë. Ne asnjëherë nuk kemi hequr dorë nga përpjekjet apo betejat në Parlament. Kjo formë e debatit në Parlament do vazhdojë dhe bashkëshoqërohet dhe me protesta”, tha ai.
