Ivi Kaso, është shprehur se qëllimi i PD më 7 korrik është që të formojë një koalicion jo vetëm me partitë opozitare por edhe me të gjithë shtresat e shoqërisë të cilët kanë arsye për t’u përballur me këtë qeveri.
Në një intervistë për Ora News,Kaso tha se arsyeja kryesore e protestës është kriza ekonomike ndërsa arsye tjetër është keqqeverisja.
Ivi Kaso: Është qëllimi i shprehur i PD që të formojë një koalicion të gjerë opozitar jo vetëm më partitë opozitare, por edhe me të gjithë shtresat e shoqërisë dhe ata faktorë shoqërorë, që kanë arsye për t’u përballur me këtë qeveri. Kërkesa vjen si përgjigje e një nevoje qytetare për të dalë për të protestuar, arsyet ekonomike në radhë të parë por jo të fundit arsyet që kanë të bëjnë me keqqeverisjen, mungesën e procesit të integrimit, të ardhmen evropiane të Shqipërisë dhe dhjetëra arsye të tjera.
PD po bën të gjitha përpjekjet për të instauruar ura komunikimi dhe për të pasur aktivitetet, të cilat përfshijnë në një masë të madhe aktivistë e simpatizantë të saj por edhe shtresat e tjera të shoqërisë.
Më tej ai tha se brenda PD nuk ka asnjë lloj xhelozie se kush e organizon protestën ndërsa shtoi se shqetësimi i tyre është që të artikulohen shqetësimet reale të shqiptarëve.
Ivi Kaso: Brenda PD nuk ka asnjë lloj xhelozie se kush e organizon protestën, nuk ka xhelozi të marrë autorësinë e protestës. Shqetësimi më i madh është që të artikulohen drejt shqetësimet reale të shqiptarëve dhe mbi të gjitha të ketë një masivitet të madh që t’i tregojë qeverisë se shqetësimet nuk janë të kufizuara në spektrin politik por edhe më gjerë.
Kaso u shpreh më tej: Mendoj se PD ka humbur mjaft kohë të çmuar duke u marrë me problemet e brendshme, me një betejë brenda vetes, betejë që nuk është dashur nga demokratët.
Ndër të tjera ai ka dhënë detaje në lidhje me protestën duke thënë se janë ngritur grupet e punës që po merren me organizimin e protestës.
Ivi Kaso: Janë ngritur grupet e punës që merren me organizimin e aspekteve të logjistikës së protestës sikundër dhe grupet e punës që do të përgatisin dhe do kenë përgjegjësi për skenarin e protestës Shumë shpejt do të publikohen dhe sloganet dhe detajet se kur do fillojë dhe kur do të mbarojë protesta.
Është një protestë që ka për të ndezur motorin e protestave.
