Janë gjashtë të dyshuar tashmë për vrasjen e arkitektit italian Roberto Mottura, vrarë në shtëpinë e tij në Piossasco, Torino, më 9 qershor 2021.
Prokurorët Marco Sanini dhe Valentina Sallaroli i kanë mbyllur hetimet. Dy nga të dyshuarit, të gjithë të nacionalitetit shqiptar, dyshohen për vrasje. Katër persona të tjerë janë nën hetim, mes tyre tre për ndihmë dhe dy për armëmbajtje, gjetur në disa shtëpi gjatë kontrollit të karabinierëve.
Arkitekti u godit nga një armë me kalibër 22, i cili i preu arterien femorale, gjatë një tentative grabitjeje në vilën e tij.
Hajdutët kishin hyrë nga një dritare dhe Mottura kishte zbritur poshtë për të mbrojtur familjen e tij kur kuptoi se dikush kishte hyrë në shtëpi.
Njëri prej hajdutëve e kishte qëlluar atë me kalibër 22 (armë identike me atë të gjetur në kasafortën e arkitektit) një e shtënë në pjesën e poshtme të barkut, duke i prerë arterien femorale. Pastaj banda ishte arratisur nga e njëjta dritare ku kishin hyrë.
Për muaj, hetuesit ndoqën gjurmët e tyre, duke analizuar çdo të dhënë të gjetur në shtëpinë e arkitektit për të kërkuar gjurmë të ADN -së së hajdutëve.
Hajdutët bënë një gabim të vetëm: ata nuk fikën menjëherë një nga celularët e disponueshëm të përdorur për grabitjen, një gjurmë e vogël që i zbuloi ata tre muaj pas vrasjes. Gjurmë të tjera biologjike mbetën në veshjen e viktimës.
