Qeveria ka hedhur për diskutim në publik draftin për Amnistinë Fiskale, për të cilin më parë janë shprehur kundër si FMN ashtu edhe organizata të tjera ndërkombëtare, përfshi këtu edhe ato të BE-së.
Idea e amnistisë që propozohet është që mund të legalizohen deri në 2 mln euro duke paguar tatimin, por pa qenë nevoja për të treguar burimin. Në raportet e fundit të Monezval, Shqipëria renditet në zonën gri lidhur me pastrimin e parave, dhe me propozimet e Qeverisë Rama, miliona euro mund të konsiderohen të pastra, nëse posejduesi i tyre bën vetëdeklarim dhe paguan tatimin.
Lidhur me propozimin e Qeverisë ka reaguar Ivi Kaso, një prej Sekretarëve të PD, i cili në rrjetet sociale shprehet se halli i Edi Ramës nuk ka qenë te ato 30 mijë euro apo stërlina që mund të kishin emigrantët, por te miliona euro të siguruara nga krimi dhe korrupsioni.
“Ja pra që nuk e paska patur për emigrantët që donin të dërgonin 30 000 £ në Shqipëri e gjoja s’mund ta bënin lehtësisht, por e paska patur për ata “hallexhinjtë” e tjerë… vëllain, motrën, shokun, mikun, shoferin, dashnoren e kujtdo që është pasuruar nëpërmjet keimit e korrupsionit e paskan hallin e madh se si do legalizojnë nga 2 mln € pasuri për kokë.
Hall i madh s’ke ç’thua por veç për këto lloj hallesh mendon kjo maxhorancë mbasi s’la hall tjetër pa ju lëshuar në shpinë shqiptarëve! Operacion më kriminal pastrimi parash të pista nuk besoj se mund të ketë, në projektim e zbatim, as në ndonjë vend të botës së tretë e jo më në një vend që aspiron të hapë negociatat për anëtarësim.
Shuplakë fytyrës MONEYVAL-it që na ka shpallur tashmë “delja e zezë” e Evropës dhe çdo naivi që ka ndonjë iluzion mbi drejtimin që ka marrë ky vend”, shkruan Kaso.
