Një vajzë e re 22-vjeçare ka çuar në pranga një djalë të ri pesë vite më të madh se vetja, duke i dhënë kështu fund makthit që përjetonte nga shantazhet që i bënte ai.
Sipas policisë, i arrestuari kishte foto e video intime të së resë dhe i kërkonte para për të mos i publikuar.
Dhe pse ajo i ka dorëzuar shumë parash atij, kërcënimet vijonin derisa vajza është paraqitur në Komisariat për ta denoncuar atë.
Arrestimi
“Shërbimet e Komisariatit të Policisë Nr. 6, pas kallëzimit të marrë nga një shtetase 22 vjeçe, se një shtetas i kishte marrë shuma të ndryshme parash dhe e shantazhonte vazhdimisht që ti jepte para të tjera, që të mos i publikonte disa foto dhe video, në rrjetet sociale, menjëherë kanë organizuar punën për kapjen e autorit të dyshuar. Gjatë operacionit policor të koduar ‘Shantazhi’, nga specialistët për Hetimin e Krimeve në Komisariatin e Policisë Nr. 6 u bë arrestimi në flagrancë i shtetasit K. K., 27 vjeç, banues në Tiranë”, njoftoi policia.
Gjatë veprimeve hetimore ka rezultuar se shtetasi K. K. i kishte marrë shuma të ndryshme parash në mënyrë të vazhdueshme, 22-vjeçares, të cilën e përndiqte dhe e shantazhonte vazhdimisht që t’i jepte shuma të tjera parash, për mospublikimin e disa fotove dhe videove që ai dispononte, shtuan të njëjtat burime.
