Në mbledhjen e Qeverisë është miratuar vendimi për shkarkimin nga detyra e Drejtorit të Përgjithshëm të Parandalimit të Pastrimit të Parave, Elvis Koçi, ndërsa në vend të tij është emëruar Iris Ago.
Elvis Koçi mbante këtë detyrë prej disa vitesh, ndërsa Shqipëria në raportet ndërkombëtare renditej në atë që konsiderohej si “lista gri” përsa i takon kritereve për pastrimin e parave.
Sipas raportimeve, shkarkimi i Koçit ka ardhur me propozim të ministres së Financave, ndërsa vendimi është miratuar në mbledhjen e Qeverisë. Koçi u emërua në funksionin që u shkarkuar sot gjatë periudhës kur ministria e Financave drejtohej nga Anila Denaj, ndërsa u shkarkua me propozimin e Delina Ibrahimajt, që drejton Ministrinë e Financave.
Në vitin 2017, Elvis Koçi ishte një nga pjesëtarët e stafit të Kryeministrit, ndërsa mbante funksionin “analist” në Këshillin e Ministrave.
Ndërkohë Iris Ago, e diplomuar për Financë-Kontabilitet, rezulton se ka mbajtur pozicionin Këshilltar në Ministrinë e Financave dhe Ekonomisë që prej muajit dhjetor 2021.
Ajo ka mbajtur pozicionin e Drejtorit në Drejtorinë e Tatimpaguesve të Mëdhenj nga viti 2020 deri në vitin 2021.
Ndërkohë që gjatë periudhës 2017 – 2020 ka drejtuar Drejtorinë e Kontrollit Tatimor, pranë Drejtorisë së Përgjithshme të Tatimeve dhe në vitet 2016 – 2017 ka mbajtur detyrën e Këshilltarit pranë Drejtorit të Përgjithshëm të Tatimeve.
Kush është Iris Ago
Iris Ago ka lindur në Tiranë 1987. Ka përfunduar studimet e larta në Fakultetin e Ekonomisë, Universiteti i Tiranës, dega Financë-Kontabilitet gjatë periudhës 2005-2009, më tej ka vazhduar studimet Master Shkencor VITET, pranë Universitetit Europian të Tiranës, si dhe zotëron titullin MSc Bankë dhe Sigurime.
Që prej muajit Dhjetor 2021 është emëruar në pozicionin Këshilltar në Ministrinë e Financave dhe Ekonomisë. Ajo ka mbajtur pozicionin e Drejtor në Drejtorinë e Tatimpaguesve të Mëdhenj nga viti 2020 deri në vitin 2021. Gjatë periudhës 2017-2020 ka drejtuar Drejtorinë e Kontrollit Tatimor, pranë Drejtorisë së Përgjithshme të Tatimeve. Nga viti 2016 deri në vitin 2017 ka mbajtur detyrën e Këshilltarit pranë Drejtorit të Përgjithshëm të Tatimeve.
Ago ka ushtruar profesionin e saj si konsulente financiare, koordinatore dhe në menaxhimin e projekteve të ndryshme në sektorin privat prej vitit 2009 deri në 2016-ën. Ajo ka përvojë dhe ekspertizë të thelluar në fushën e konsulencës financiare; tatimore dhe kontabilitetit për kompanitë të sektorëve të ndryshëm; këshillim për fondet e investimeve; planifikim marketingu; studime fizibilitetiti; studim tregu; plan biznesi; konsultim për marrëdhëniet e shoqërisë me institucionet financiare për kreditim ose financim; konsultim për marrëdhëniet e kompanisë me sektorin publik. Pjesë e rëndësishme e detyrave gjatë përvojës në sektorin privat ka qenë dhe angazhimi në disa projektë strategjike, si ai i gazsjellësit TAP.
Është trajnuar mbi Standardet Kombëtare dhe Ndërkombëtare të Kontabilitetit (SKK & IFRS), Sfidat e Lidershipit në Shqipëri organizuar nga Universiteti George Washington, si dhe ka kontribuar në programin e “Doing Business” për vite me radhë. Ajo zotëron gjuhët anglisht dhe italisht.
