Kultivuesit e shalqirit në Divjakë akuzojnë grumbulluesit se po zbatojnë një skemë të paracaktimit të një çmimi të ulët për produktin, në kulm të prodhimit. Të mbledhur në proteste, ata kërkuan reagimin e Ministrisë së Bujqësisë dhe Financave.
Mijëra kuintal Shalqi po mbetet parcelave në Çermë të Divjakës.
Fermerët thonë se me çmimin deri në 12 lekë për kilogram nuk mbulojnë as kostot këtë vit të plehrave.
Ndaj këtë të enjte dolën në proteste për ti kujtuar qeverisë që po rrezikojnë falimentimin.
“Edhe me 100 lek nuk e shesim sot, ku të shkoj, ku të mbytem unë? Hektari shkon 6 mijë euro. Me plastmas me produkte me të gjithë shkon 6 mijë euro. Jemi të falimentuar shkuam në zero. Mua më vjen keq se kam ato kalamaj të mbarojnë shkollën, se do kisha ik”, thonë fermerët.
Denoncuan për një skemë abuzimi në kurriz të fermerëve pas të cilës thonë se qëndrojnë grumbulluesit.
“Produktin që e marrin nuk vendosin çmim, thjesht marrin mallin dhe thonë do ta vendosim çmimin pas tre 4 ditësh. Në rast se është 100 lek e vendosin 80.”
Vetëm në fshatin Çermë përllogaritet mbi 100 hektarë tokë e kultivuar me shalqi.
Prodhimi tashmë ka arritur pjekjen dhe nësë nuk shitet për 15 ditë, atëherë do të kalbet në ara.
