Prokuroria Tiranë dërgon për gjykim katër persona, administratorin dhe ish-aksionerët e Shoqërisë ‘Neku’ Sh.p.k. për fshehje të ardhurash.
Prokuroria pranë Gjykatës së Shkallës së Parë Tiranë ka përfunduar hetimet dhe ka dërguar për gjykim për veprën penale të ‘Fshehjes së të Ardhurave’ katër shtetas, administratorin dhe ish-aksionerët e Shoqërisë ‘Neku’ Sh.p.k.
Prokuroria ka regjistruar procedimin penal nr.8822 të vitit 2021, për veprën penale të “Fshehjes së të ardhurave”. Nga veprimet hetimore paraprake të kryera nga Prokuroria në bashkëpunim me Sektorin e Hetimit Tatimor, në Drejtorinë e Përgjithshme të Tatimeve, ka rezultuar që subjekti “Neku’’ Sh.p.k. me Nipt L01405006G, me administrator shtetasin A.K., si dhe ish aksionerët e kësaj shoqërie shtetasit: Rr.D., A.H. dhe R.L., me aktivitet “Tregtia me shumicë e mineraleve metalike dhe e metaleve”, me adresë ushtrimi të aktiviteti Rruga Pazari, Terminali Bulqizë, kanë konsumuar elementët e figurës së veprës penale të “Fshehjes së të Ardhurave”.
Objekt i hetimit janë veprimtaria e subjektit “Neku’’ Sh.p.k. si edhe kalimi i kuotave të kapitaleve të kësaj shoqërie për një shumë totale prej mbi 260 milionë lekë të reja duke mos i deklaruar dhe shmangur detyrimet ndaj organeve tatimore.
Për këtë arsye, nga Prokurori Bledar Valikaj janë marrë të pandehur subjekti ekonomik dhe shtetasit e mësipërm për veprën penale të “Fshehjes së të Ardhurave” dhe çështja është dërguar për gjykim pranë Gjykatës së Shkallës së Parë Tiranë.
