Avokatët në Korçë, Shkodër, Lezhë dhe Vlorë vazhdojnë bojkotin e seancave gjyqësore.
Ata kanë vendosur ta zgjasin bojkotin e seancave gjyqësore, pas projekti të Këshillit të lartë gjyqësor për shkrirjen e gjykatave të apelit ne rrethe.
“Duke risjellë në vëmendje të opinionit publik edhe njëherë se Dhomës Vendore të Avokatisë Lezhë i mbyllën dy gjykata të Shkallës së parë, Gjykata e Krujës dhe ajo e Kurbinit, si radhë ndonjë dhomë tjetër. Këto shkurtime prekin drejtpërdrejtë cilësinë, shpejtësinë dhe aksesin e qytetarëve të Lezhës, Mirditës, Kurbinit dhe Krujës në marrjen e drejtësisë. Kemi vendosur të thërrasim protestë duke ftuar të gjithë qytetarët e Lezhës, pa dallime politike apo shoqërore. Është bërë e qartë tashmë nga ana e mediave lidhur me vendimin tonë për të bojkotuar edhe me një javë tjetër të gjitha seancat gjyqësore. Ftojmë qytetarët të na bashkohen ditën e martë datë 21.06.2022 ora 10:00 me protestën kundër “Hartës Gjyqësore” përballë bashkisë Lezhë. Kohëzgjatja e protestës do të jetë 2 orë”, thuhej në njoftimin e dhomës së avokatisë në Lezhë.
Ndërsa, avokatët në Tiranë dhe Elbasan janë rikthyer në punë, me disa përjashtime individuale.
Harta e re gjyqësore ka sjellë debate e kundërshti. Ajo parashikon në total 13 gjykata të shkallës së parë, 2 gjykatë administrative dhe shkrirjen e gjykatave të apelit në një të vetme. Avokatët i kërkojnë qeverisë të mos e miratojë këtë skemë.
