Armand Shkullaku ka folur për hartën e re gjyqësore, që do të sjellë mbylljen e gjykatave dhe centralizimin e tyre në disa qytete, kryesisht në Tiranë.
I ftuar në emisionin “Të Paekspozuarit” në MCN TV, Shkullaku tha se kjo ka ndodhur si pasojë e dështimit të reformës në drejtësi, kapjes së saj nga politika dhe vettingut të padrejtë, që ka nxjerrë nga sistemi një numër të madh gjyqtarësh dhe ka konfirmuar kryesisht persona që i shërbejnë mazhorancës.
Shkullaku tha se ngjarje të tilla me drejtësinë do të vijojnë.
“Është ajo që BE e pranoi me zë dhe figurë për Maqedoninë e Veriut, që tha në asnjë mënyrë nuk duhet të bëjë të njejtën reformë si Shqipëria. BE e ka pranuar që ajo që ka ndodhur te ne është dështim. Nëse do të ndodhte në BE dhe SHBA, alarmi do të ishte i madh dhe do të bëhej gjithçka për ta riparuar. Këtu askush nuk e pranon që është dështim.
Dështim jo vetëm sepse ngelëm pa Gjykatë Kushtetuese, apo se vettingu kalonin njerëzit që i shërbenin pushtetit. Po marrim vetëm faktin e fundit, që është ndarja territoriale e gjyktave.
Parimi bazë, aksesi në drejtësi dhe e dyta drejtësia në kohë.
Që nga vendosja e tarifave për të shkuar në gjykatë, ligjvënësit kanë parashikuar që kjo tarifë ti japë mundësi edhe një fukarai që të ankimojë një padrejtësi.
E dyta, vonesa. Po të marrim rastin e ndarjes. IKMT vendos gjobë dikujt në Sarandë. Gjoba kushton 5 milionë lek të vjetra. Ky ditëzi do të marrë rrugën deri në Lushnje. Karburanti me tarifat e Ramës, është i shtrenjtë. Tarifa e gjykatës e shtrenjtë, karburanti kushton, ushqimi, lufta në Ukrainë… Pra njeriu pranon gjobën, sepse ankimimi bëhet më e shtrenjtë se drejtësia.
Ky rast është pasojë e një reforme kryekëput të gabuar. Kjo reformë do të na çojë në këto idiotësira. Ne do të kemi edhe idiotësi të tjera.
Mund të jetë edhe si kjo e Manjas, që ka çështje që heqim dorë, nuk i ndjekim më…
Ose propozimi që një fondacion i ndihmuar nga Soros, të selektonte dosjet dhe ti vendoste cila do të shkojë në Gjykatën e Lartë.
Të jeni të bindur, që pas një viti, mund të merret vendim nga parlamenti, që shiko disa çështje nuk kanë pse të shkojnë në gjykatë, por ti vendosë ministrja për parlamentin që ka Rama (Spiropali).
Sa dosje ka sot gjykata e apelit dhe e lartë? Njerëzit kanë vdekur ndërkohë…”, tha Shkullaku.
