Kryeminisri Albin Kurti deklaroi në fillimin e mbledhjes së përbashkët të Qeverisë së Kosovës dhe Qeverisë së Shqipërisë se problemet politike zgjidhen në fillim dhe jo në fund.
Duket se ky ishte leksioni i parë që Kurti i ka dhënë homologut të tij Edi Rama, që mbron nismën e Ballkanit të Hapur.
Kurti tha se tani Kosova dhe Shqipëria mund ta lexojnë më qartë gjendjen e krijuar në rajon e botë dhe tha se “përcaktimi ynë është më i thjeshtë”. “Prandaj, edhe këto mbledhje të qeverisë tingëllojnë më të vërteta e më efektive sesa më parë”, tha ai.
“Bashkëpunimi dhe integrimi dhe zhvillimi i qëndrueshëm në gjithë rajonin sigurohet duke i zgjidhur problemet politike në fillim dhe jo në fund. Lënia për fund dhe mbajtja pezull e zgjidhjes së problemeve esenciale politike mban pezull mosbesimin e ndërsjellë social”, tha Kurti.
“Bashkëpunimin dhe integrimin brenda kombit dhe ndërmjet dy shteteve tona e ka lehtësuar fakti se veç sa po e zbatojmë në rastin tonë parimin dhe praktikat tashmë të njohura të Bashkimit Europian, përderisa edhe anëtarësimi ynë në BE mbetet synimi ynë i përhershëm dhe drejtues i politikave tona”, tha ai.
Kurse Rama tha se nuk ka çështje të hapura mes tij e Kurtit.
“Njerëzit kërkojnë të fusin xixa mes nesh, dhe kërkojnë çështje të hapura mes meje dhe homologut këtu. Nuk ka të tilla sepse jemi shumë të hapur, dhe për çështjet që nuk merremi vesh kemi kënaqësinë t’i ndajmë që jemi marrë vesh për të mos u marrë vesh”, ka thënë Rama.
Ai vlerësoi se ka raporte të mira me Kurtin, duke shtuar se “qeshim mes vete”.
“Dua ta falënderoj Binin dhe ju të gjithëve, por në veçanti Binin. Është një kënaqësi e veçantë që kur ne takohemi, kemi një sinergji të plotë dhe qeshim jo pak, kjo është e rëndësishme”, ka thënë Rama në fillim të mbledhjes së dy qeverive.
