Nga Boldnews.al
Kompania “Gjikuria”, e cila njihet për “bëmat” e saj në jug të Shqipërisë për ndërtimin e fshatit “Green Coast”, apo edhe për tenderët për rrugë dhe ujësjellësa, është favorizuar edhe në një procedurë tepër të majme.
Kompania ka pësuar ngritje në momentin që ishte ndërtuese e fshatit të të pasurëve, teksa edhe institucionet tashmë po e shohin me “një sy tjetër”. Redaksia e BoldNeës.al ka siguruar disa dokumente të një tenderi që ka kryer Autoriteti Rrugor Shqiptar, një institucion i drejtuar nga Evis Berberi, një i besuar i ministres Belinda Balluku. Në dokumente rezulton se kjo firmë është favorizuar ndjeshëm në këtë procedurë, teksa ka arritur që të marrë tenderin 11 milionë euro, megjithëse ofroi 1.5 milionë euro më shumë se oferta më e ulët. Por, me këto para’ mund të bëheshin disa kopështe apo çerdhe në Maliq, apo edhe qendra shëndetësore. Por, këto para po shpenzohen për këtë rrugë.
Boldnews.al ka siguruar dokumentet e këtij tenderi, i cili ka qenë i hapur mbi kufirin e lartë monetar. “Objekti i tenderit ka qenë ‘rikonstruksion i aksit rrugor Maliq-Lozhan i Ri-Strelcë’ me fond limit 1.183.260.667 lekë pa TVSH.
Në tender kanë marrë pjesë disa firma, ku oferta më e ulët ka qenë e firmës “ARIFAJ” SHPK & EUROKOS HOLDING me vlerë 1.055.530.088 lekë pa TVSH. Oferta e dytë më e ulët ka qenë e “SIRETA 2 F” & “KUPA” & “KLAJGER KONSTRUKSION” me vlerë 1.111.111.111 lekë pa TVSH. Oferta e tretë ka qenë “PE – VLA – KU” me 1.123.818.390 lekë, ndërsa e katërta BOE “BE – IS” SHPK & “ERGI” SHPK & “VELLEZERIT HYSA” me ofertë 1.137.311.585.
Dhe, vetëm e pestë oferta e firmës “GJIKURIA” me vlerë 1.164.381.419 lekë pa TVSH, ose me TVSH rreth 11 milionë euro. Pra, diferenca nga oferta më e ulët deri te oferta fituese është rreth 160 milionë lekë të rinj, ose 1.5 milionë euro. Një vlerë e konsiderueshme, pasi Berberi ia ka prerë disa investimeve të tjera për t’ia dhënë kësaj kompanie.
Sipas dokumenteve të publikuara nga vetë ARRSH thuhet se 4 ofertat më të ulëta janë s’kualifikuar me arsye se duhet të plotësonte personelin kryesor dhe mbështetës, drejtues teknik në licencën e shoqërisë. Oferta më e ulët është skualifikuar për shkak se drejtuesi teknik është deklaruar në një tjetër procedurë. Madje, edhe disa nga makineritë janë në një tender tjetër.
Ndërkohë, oferta e dytë është s’kualifikuar për arsye se s’ka punë të ngjashme. E treta, “PE – VLA – KU” s’ka xhiro vjetore. Edhe kjo firmë s’ka staf teknik dhe makineri. Pra, nga një vëzhgim i redaksisë rezultoi se të gjitha s’kanë dokumente apo makineri. Të cilat i ka vetëm “Gjikuria”, e cila është favorizuar ndjeshëm.
