Gjergj Luca është një ndër përfituesit më të mëdhenj të kontratave simbolike ‘1 euro’ me qeverinë “Rama”.
Prej vitit 2015, përllogaritet që kompania e tij, “Rozafa” shpk ka përfituar rreth 100 mijë metra katrorë truall e ndërtesa publike me afat disa dhjetëra vjet.
Kontrata më e fundit u miratua nga qeveria pak ditë më parë, ku përcaktohet se Luca dhe shoqëria e tij do të shfrytëzojnë për 1 euro rreth 5 mijë metra katrorë ndërtesa në ish-Kombinatin e Maliqit.
Megjithatë, kur Gjergj Luca duhet të japë pronat e tij me qira për autoritetet shtetërore, ai sillet si një biznesmen i vërtetë, ku qëllim kryesor është fitimi. Madje, një fitim shumë i majmë.
Në fund të kësaj jave, Dogana e Lezhës ka paguar 250 mijë lekë të reja për llogari të “Rozafa” shpk. Kjo faturë është në vijim të një kontrate qiraje të nënshkruar ndërmjet Doganave Shqiptare dhe kompanisë së Gjergj Lucës, për shfrytëzimin e një prone të biznesmenit nga administrata shtetërore në Portin e Shëngjinit. Të dhënat zyrtare, të përmbledhura nga “Open Data”, tregojnë se kontrata e qirasë është nënshkruar në fillim të vitit 2019 dhe deri më tani Luca ka arkëtuar rreth 100 mijë euro.
Referuar informacioneve në Qendrën Kombëtare të Biznesit, prej vitit 2014, Luca është pronar i një ndërtese dykatëshe përballë Portit të Shëngjinit, ku ka zhvilluar aktivitetin e tij tregtar. Në shkurt 2019, Luca jep këtë pronë me qira Doganës së Lezhës dhe menjëherë mbyll adresën dytësore në këtë pikë. Duket qartë që të ardhurat nga qiraja ishin më të mira se sa fitimet nga aktiviteti privat në atë zone.
Shuma e shpenzuar deri më tani nga administrata doganore për qira ambientesh në favor të shoqërisë “Rozafa” shpk mjaftonte që institucioni të ndërtonte një pikë të sajën në portin e Shëngjinit. Por, ka zgjedhur që ato para t’ia japë Gjergj Lucës. /Syri Tv/
