Gazeta italiane, Il Resto del Carlino, shkruan sot lidhur me skandalin e arrestimit të ish-kryebashkiakut të Edi Ramës, Agim Kajmaku, i kapur me kokainë në Itali.
Sipas medias italiane, në shënjestër janë edhe të tjerë politikanë të lartë të Partisë Socialiste shqiptare.
“Selia kryesore e shpërndarjes ishte në Monterubbiano. Në shënjestër janë edhe politikanë dhe figura të shquara të Partisë Socialiste shqiptare,” shkruan gazeta.
“Mund të tingëllojë si një titull filmi, por është një realitet i pastër. Interpoli, karabinierët dhe policia shqiptare po hetojnë një trafik të gjerë droge, ku disa politikanë shqiptarë, dhe në veçanti ish-kandidati për kryebashkiak i kryeministrit Edi Rama, i cili u arrestua tre javë më parë në Grottammare, së bashku me nipin, me 20 kg kokainë”.
“Në pranga kanë përfunduar Edmond Kajmaku, 34 vjeç, banues në Monterubbiano dhe daja i tij, Agim Kajmaku, ish-kryetar i Bashkisë së Vorës dhe eksponent i njohur politik shqiptar i Partisë Socialiste. Të dy aktualisht akuzohen vetëm për trafik droge. Tani për tani, sepse situata e tyre, edhe aktualisht mjaft e kompromentuar, mund të përkeqësohet më tej nëse hipotezat e hetuesve do rezultojnë të sakta,” vijon gazeta.
Agim Kajmaku dhe nipi i tij, Edmondi u vunë në pranga pasi u kapën me 20 kilogramë kokainë. Nëse kjo sasi do të hidhej në treg do të arrinte fitime deri në 1 milionë euro. Monterubbiano ishte kryqëzimi i kokainës, pasi sipas mediave italiane dyshohet se më pas shpërndahej në qytete të tjera në Itali ose çohej deri në Holandë.
Plani ishte thuajse perfekt. Tregu i gjerë i kokainës menaxhohej nga një fshat i izoluar i Marche-s, shumë pranë porteve të Ancona-s dhe Bari-t. Por diçka shkoi keq. Karabinierët e gjetën drogën brenda vazove të luleve që ishin blerë nga kompania, ku Agim Kajmaku ishte aksioner, ndërsa tashmë është në pronësinë e bashkëshortes së tij. Kjo ka bërë që hetimet të shtrihen edhe në Shqipëri.
Media italiane thotë se ditët e fundit në portin e Durrësit është ushtruar kontroll në një prej kamionëve të kompanisë shqiptare. Aty janë zbuluar disa vende të fshehta ku dyshohet se futej droga megjithatë, brenda mjetit nuk është konstatuar asnjë sasi droge. Prandaj autoritetet dyshojnë se kjo është skema se si kanë arritur të lëvizen qindra kilogramë drogë.
Il Resto Del Carlino thotë se policia shqiptare ka arritur që të zbulojë një llogari bankare në emrin e gruas së Agim Kajmakut me 2 milionë Dollarë brenda. Nën hetim është origjina e këtyre parave. Hetuesit kanë verifikuar po ashtu, se Kajmaku ka udhëtuar nga Tirana në Ancona me avion 5 ditë para se të sekuestrohej sasia e drogës. Më pasi, ai ka udhëtuar në Monterubbiano së bashku me nipin e tij, duke përdorur një makinë me qira.
Sipas të dhënave nga mediat italiane, nipi i Kajmakut, Edmond Kajmaku, 34 vjeç, para se të arrestohej jetonte në Monterubbiano dhe më përpara ka qenë drejtor i UKT.
“Pra dy persona të padyshuar: Një politikan dhe një ish-ekzekutiv i rëndësishëm. Megjithatë, të dy kanë lëvizur kilogramë të tërë me drogë me supozimin se mbështeten nga krimi i organizuar shqiptar”, shkruan media italiane.
Ish-kreu i Bashkisë së Vorës u arrestua bashkë më nipin e tij në 27 Maj në Itali pas një operacioni antidrogë ku iu gjetën 20 kg kokainë. Lënda narkotike ishte fshehur brenda vazove të bimëve që ishin blerë nga kompania në zotërim të Kajmakut.
