Nga Boldnews.al
Institucionet që përbëjnë arkitekturën e Drejtësisë së Re dhe garantët ndërkombëtarë, Operacioni Ndërkombëtar i Monitorimit, kanë rënë në një emërues të përbashkët përballë rastit “Etleda Çiftja”-Heshtje peshku.
Anëtarja e Komisionit të Pavarur të Kualifikimit (KPK), rreth tre javë më parë, është marrë e pandehur nga Prokuroria e Posaçme për veprat penale të “Falsifikimit të dokumentave” dhe “Deklarimit të rremë të pasurisë”.
Në raste të ngjashme-përfshirë dy anëtarët e Kolegjit të Posaçëm të Apelimit (KPA), Luan Daci dhe Ardian Hajdari, institucionet e rivlerësimit kanë vendosur pezullimin nga detyra të tyre, deri në përfundim të procesit penal.
Ndërsa në rastin e komisioneres së shkallës së parë të Vetingut, thuajse të gjithë institucionet përgjegjëse po luajnë rolin e strucit.
Ligji për “Rivlerësimin kalimtar të gjyqtarëve dhe prokurorëve”, në nenin 17 të tij, parashikon që kërkesën për nisjen e procedimit disiplinor ndaj anëtarëve të trupave të Vetingut e kanë; çdo komisioner për komisionerët e tjerë të KPK-së; çdo gjyqtar për anëtarët e tjerë të Kolegjit të Posaçëm të Apelimit; dhe Operacioni Ndërkombëtar i Monitorimit (ONM) për të gjithë anëtarët e trupave të rivlerësimit.
Mbështetur në këtë parashikim ligjor, “Boldnews.al” ka pyetur zyrtarisht institucionet, nëse kanë ndërmarrë hapat për procedimin disiplinor dhe pezullimin nga detyra të Etleda Çiftjas.
Operacioni Ndërkombëtar i Monitorimit dhe Këshilli i Lartë Gjyqësor, megjithëse kujdesen shpesh që të theksojnë transparencën e tyre, nuk e kanë parë të arsyeshme të kthejnë përgjigje.
Kolegji i Posaçëm i Apelimit ka dhënë një përgjigje, e cila tregon më së shumti se nuk ka vullnet për të trajtuar rastin me seriozitet.
Heshtja e institucioneve
Struktura e Posaçme Anti-Korrupsion (SPAK), konfirmoi më herët për redaksinë se kishte informuar zyrtarisht institucionet e rivlerësimit për vendimin, me të cilin ka marrë të pandehur komisioneren e Vetingut, Etleda Çiftja.
Njoftimi u ka shkuar, ndër të tjera, Komisionit të Pavarur të Kualifikimit (KPK) dhe Kolegjit të Posaçëm të Apelimit (KPA).
Komisioni i Pavarur i Kualifikimit
Komisioni i Pavarur i Kualifikimit (KPK), institucioni ku ushtron funksionet Etleda Çiftja, nuk është nevoja të pyetet nëse ka marrë apo jo masa ndaj anëtares së saj.
Komisionerja Çiftja vijon normalisht detyrën dhe ka zhvilluar seanca ndaj subjekteve të rivlerësimit edhe pasi është marrë në cilësinë e të pandehurës.
Mungesa e reagimit të këtij institucioni, më së paku mund të ngarkojë me përgjegjësi penale të “Shpërdorimit të detyrës” titullaren e tij, Pamela Qirko.
Por, praktika e deritanishme ka treguar se “pandëshkueshmëria” më e madhe qëndron tek zyrtarët e Vetingut.
Operacioni Ndërkombëtar i Monitorimit
Një heshtje të pakuptimtë ka përfshirë edhe Operacionin Ndërkombëtar të Monitorimit, garantët e zbatimit të Reformës në Drejtësi në Shqipëri.
Redaksia ka pyetur ditë më parë zyrtarisht strukturën ndërkombëtare, nëse ka kërkuar procedim disiplinor dhe pezullim të komisioneres Etleda Çiftja, pasi ajo është marrë e pandehur në një procedim penal.
Struktura që varet nga Brukseli nuk ka dhënë asnjë lloj komenti.
Më herët, vëzhguesit ndërkombëtarë janë treguar shumë skrupuloz në ndjekjen e rasteve të dyshimta, të publikuar në media, ndaj gjyqtarëve dhe prokurorëve.
Në një rast konkret, ku përfshihet edhe “Boldnews.al”, vëzhguesi Teo Jacobs ndoqi një situatë problematike në Prokurorinë e Durrësit, pas raportimeve të redaksisë mbi një konflikt ndërmjet drejtueses Anita Jella dhe prokurorit të pezulluar tashmë, Arjan Ndoja.
Roli aktiv i vëzhguesit Jacobs në këtë rast gjendet i trajtuar gjerësisht në vendimin e Komisionit të Vetingut për prokuroren Jella.
Ndërkohë që, në rastin e komisioneres Etleda Çiftja, Operacioni Ndërkombëtar i Monitorimit nuk duket se është vënë në lëvizje, edhe pse informacioni ndaj saj ka mbërritur nga Prokuroria e Posaçme.
Kolegji i Posaçëm i Apelimit
Kushtetuta ka ngarkuar Kolegjin e Posaçëm të Apelimit me detyrimin për të shqyrtuar hetimet disiplinore ndaj anëtarëve të të gjitha niveleve të trupave të Vetingut.
Kolegji i Posaçëm i Apelimit (KPA), është i vetmi institucion që, të paktën formalisht, ka respektuar detyrimin për transparencë.
Megjithatë, përgjigja e tij për “Boldnews.al” nuk është aspak shpresëdhënëse për trajtimin me seriozitet të rastit.
Pra, Kolegji i Apelimit ka vendosur të qëndrojë në pozita tërësisht pasive dhe pret të vihet në lëvizje nga struktura të tjera, megjithëse është njoftuar zyrtarisht për marrjen në cilësinë e të pandehurës së komisioneres Çiftja.
Këshilli i Lartë Gjyqësor
Duke ndjekur parashikimet kushtetuese, redaksia zgjeroi hartën e institucione, ku kërkoi informacion për procedimin disiplinor ndaj Etleda Çiftjas.
Ligji themeltar parashikon që komisionerët e KPK-së gëzojnë statusin e anëtarit të Gjykatës së Lartë.
Pezullimi i tyre kryhet nga Këshilli i Lartë Gjyqësor. Për këtë arsye, “Boldnews.al” iu drejtua zyrtarisht “Qeverisë së Gjyqësorit”.
Përgjigja pa përgjigje është e njëjtë me institucionet e tjera-Heshtje.
Inspektori i Lartë i Drejtësisë
Kushtetuta i ngarkon Inspektorit të Lartë të Drejtësisë detyrën që të nisë hetimin disiplinor, edhe kryesisht, për gjyqtarët e të gjitha niveleve, përfshirë edhe ata të Gjykatës së Lartë e zyrtarët që barazohen me ta, siç janë anëtarët e Komisionit të Pavarur të Kualifikimit.
Interesimit të redaksisë Boldnews, ILD nuk ju përgjigj deri në momentin e publikimit të këtij shkrimi.
