Prej kohësh porti i Durrësit është kthyer si një pikë kyçe për sasitë e kokainës që ngarkohen në Amerikën Latine dhe kanë si destinacion tregjet europiane.
Mbrëmjen e djeshme u bllokua një sasi prej 45.5 kg kokainë, e ndarë në 40 pako, e cila ndodhej në një kontenier ku ishin ngarkuar tonelata pulash.
Ngarkesa, referuar raportimeve, kishte kaluar tranzit nga Brazili, ndërsa konteineri kishte si destinacion final Maqedoninë e Veriut.
Mësohet se ngarkesa me mish ishte porositur nga një firmë kosovare.
Policia njoftoi se vijon puna hetimore për identifikimin dhe kapjen e personave të dyshuar që fshihen pas ngarkesës prej 45.5 kg kokainë.
Kjo është sasia e dytë e drogës që sekuestrohet nga Policia e Durrësit në port në harkun kohor të një muaji pasi më 17 Maj një tjetër ngarkesë prej 59 kg kokainë u kap në një konteiner me qymyr që vinte nga Ekuadori.
Më parë janë raportuar raste të sekuestrimit të sasive të kokainës në kontenierët me banane. Ndoshta kapja e disa ngarkesave në portin e Durrësit pikërisht në këto kontenierë ka detyruar trafikantët që të tentojnë trafikimin e drogës edhe përmes ngarkesave të tjera, si në rastin e qymyrit, apo mishit të pulës.
Autoritetet shqiptare përgjithësisht nuk kanë mundur të zbulojnë rrjetin e porositësve të narkotikëve në Shqipëri, edhe pse ka pasur arrestime dhe dënime për administratorë kompanish, të cilët nuk kanë pranuar se kanë pasur dijeni për ngarkesat me drogë.
