Ish-kryetari socialist i Bashkisë së Vorës mohon të ketë dijeni për drogën e sekuestruar nga autoritetet ligjzbatuese italianë në një fidanishte në Grottammare (komunë në Ascoli Piceno). Lajmi bëhet i ditur nga mediat italiane, që citojnë avokatin e Kajmakut.
Në një artikull të publikuar këtë të Enjte, “il resto del carlino” shkruan se të Hënën e javës së ardhshme, paketimet me kokainë të sekuestruara nga karabinierët e San Benedetto-s brenda një fidanishte në Grottammare do të dërgohen në Ankona për t’u analizuar me qëllim përcaktimin e përqindjes së pastërtisë së drogës.
Si u kap kokaina
Ndërkohë, hetuesit vijojnë hetimet për të konstatuar se si kanë mbërritur në fidanishte 18.8 kilogramë kokainë, që ishin fshehur në vazot e bimëve që ishin blerë nga fidanishtja e Kajmakut.
Agim Kajmaku, pronar i një fidanishteje në këtë zonë, jeton me familjen në Monterubbiano, ndërsa nipi i tij jeton në Terra delle Aquile, ku punon si punëtor. Të dy u arrestuan.
Po sipas medias italiane, ata shkuan për të blerë bimë në disa fidanishte të zonës dhe i mblodhën në fidanishten në Grottammare, ku duhej të ngarkoheshin. Por, më vonë, aty u zbulua sasia e kokainës e fshehur në vazot me lule, që vlerësohet se do të gjeneronte rreth 1 mln euro nëse do të hidhej në treg.
Tanimë po hetohet për të zbuluar se nga erdhi droga.
Kajmaku pretendon pafajësi
Karabinierët identifikuan Kajmakun dhe nipin e tij që ndodheshin në afërsi të fidanishtes dhe një furgon, të cilët u ndaluan. Raportohet se në banesat e tyre si edhe në ambientet ku ndodhej fidanishtja e Kajmakut nuk u gjet asgjë e kundërligjshme. Nga ana tjetër, raportohet se Kajmaku dhe nipi vazhdimit kanë mohuar akuzat e ngritura ndaj tyre dhe kanë deklaruar se nuk kanë asnjë lidhje për drogë e asnjë dijeni për të.
Avokati mbrojtës i të dyve, Vittorio Supino, thotë se ka ende shumë punë për të bërë për të zbardhur pozicionin e klientëve të tij.
Avokati foli po ashtu edhe për një çantë me shirit ngjitës (adeziv) që pretendohet se i përket të arrestuarve. Ai tha se i njëjti shirit i gjetur aty nuk rezulton të jetë përdorur për të mbyllur paketimet e kokainës të gjetura të fshehura në vazot e luleve.
