Prokuroria ka përfunduar hetimet dhe e ka dërguar për gjykim çështjen ndaj Klodian Çalamanit, i cili vrau 8-vjeçarin Mateo Vasia, në Nëntor të vitit 2021.
Prokuroria e akuzon 40-vjeçarin Çalamani për përdhunim dhe vrasje me dashje. Sipas hetimeve të akuzës, Çalamani ka abuzuar seksualisht me fëmijën dhe më pas e ka vrarë.
Ngjarja
Prokuroria e Rrethit Gjyqësor Fier ka njoftuar këtë të Mërkurë se ka përfunduar hetimet për rastin dhe ka dërguar për gjykim të pandehurin Klodian Çalamani i akuzuar për veprat penale “Marrëdhënie seksuale ose homoseksuale me të mitur me dhunë” dhe “Vrasja në rrethana të tjera cilësuese ndaj të miturit”.
Nga hetimet paraprake, sqaon organi i akuzës rezultoi e provuar se në datën 16.11.2021, babai i Mateos, ka bërë kallëzim penal rreth orës 14:58 pasi është njoftuar në telefon nga bashkëshortja se djali i mitur nuk ka ardhur në banesë dhe nuk dihej vendndodhja e tij, duke dhënë dhe karakteristikat e fëmijës dhe veshjen e tij. Menjëherë pasi është marrë kallzimi penal Nr.1262 dhe shërbimet e Komisariatit të Policisë Fier kanë shkuar në fshatin Grecalli, ku kanë kryer verifikime dhe kontroll territori.
Është bërë identifikimi i biçikletës që përdorte fëmija dhe ka rezultuar se një të tillë e dispononte i dyshuari Klodian Çalamani banor i këtij fshati, i cili e kishte banesën rreth 100m larg banesës së të miturit. Gjatë kontrollit të banesës është dalluar një pjesë toke e punuar ku pas gërimimit u gjet trupi pa jetë i viktimës. Në këto kushte, është bërë prangosja dhe shoqërimi i Çalamanit.
“Në analizë të të gjitha provave të grumbulluara, rezulton e provuar se i pandehuri, para se të kryente veprën penale të ‘Vrasjes në rrethana cilësuese ndaj të miturit’ të parashikuar nga neni 79 germa ‘a’, ka konsumuar fillimisht veprën penale të ‘Marrëdhënies seksuale ose homoseksuale me të mitur me dhunë’, të parashikuar nga neni 100/2 i K.Penal. Pas kryerjes së aktit homoseksual me dhunë ndaj të miturit, i pandehuri Klodian Çalamani, ka kryer vrasjen me sende të forta kazëm e lopata”, thuhet në njoftimin e prokurorisë.
