Tirana ka vazhduar fazën përgatitore në Turqi për Champions League, ku më 5 korrik do të përballet me F91 Dudelange për të zhvilluar mes tyre raundin e parë të këtij kompeticioni.
Drejtuesit bardheblu kanë menduar edhe për të zhvilluar miqësore në mënyrë që të shikojnë sa më mirë edhe gjendjen e lojtarëve të cilët priten të luajnë titullarë.
Lajmin e ka bërë të ditur vetë klubi kryeqytetas nëpërmjet një postimi në rrjetet sociale, ku thuhet se kampionët do të masin forcat me Dinamo Tiraspol, takim që do të luhet ditën e sotme në orën 15:30.
“Ditën e sotme në orën 16:30 (TRT)/15:30 (CET), ekipi do të zhvillojë një ndeshje miqësore me Dinamo Tiraspol Në përfundimin e kësaj ndeshje do të publikohen dhe momentet më pikante të këtij takimi”- shkruhet në postimin e Tiranës.
