Partizani është nisur drejt sot Sllovenisë për fazën përgatitore të Conference League. Të kuqtë mësuan dje se në turin e parë do përballen me Saburtalo të Gjeorgjisë. Për këtë gjë ka folur edhe trajneri Dritan Mehmeti. Tekniku i Demave është konfirmuar në stol, ndërsa për gazetaren Trevisa Tufa ka shpjeguar edhe pozicionet për afrimet në merkato.
“Arsyeja kryesore pse kemi zgjedhur Slloveninë është veç kushteve edhe për ndeshjet miqësore, për të kapur ritmin e duhur.
Kundërshtari në Conference League? Është një skuadër që ka alternuar shumë mirë pjesën e lojtarëve me eksperiencë por ka emra dhe moshë të re. Ka ardhur nga Kupa në Europë. Janë ekspertë në ndeshjet vajtje-ardhje, meritojnë respekt. Do përgatitemi dhe do studiojmë shumë më tepër kundërshtarin për të kaluar grupin.
Shanset? Jemi në proces formimi të ekipit, duket të kemi 3-4 afrime sepse na janë larguar lojtarë të rëndësishëm. Të kolaudohemi për të bërë paraqitje siç e meriton Partizani.
Ambientimi? Largimet janë të rëndësishme, ne na kanë detyruar të punojmë fort për zëvendësimet. Duhet të gjejmë më të mirët për filozofinë tonë.
Kemi diskutuar, kam pasur kërkesat e mija dhe sugjerimet nga klubi për merkaton. Do punojmë si staf për zgjedhjet. Duhet të kemi dublim të pozicioneve. Në mbrojtje dhe sulm kemi nevoja urgjente.
Presidenti dhe besimi në stol? Personalisht të jesh trajner te Partizani është krenari, është maja e trajningut shqiptar. Është Partizani dhe duhet të menaxhosh presionin”, tha Mehmeti.
