Trupi i dekompozuar që u gjet dy ditë më parë në malin e Gramozit, dyshohet se i përket Sherif Mukajt, konfirmoi këtë të Hënë policia.
Dy ditë më parë, një kufomë e seksit mashkull u gjet e dekompozuar në vendin e quajtur “Hau i Kreshovës”, në malin Gramoz të Kolonjës.
Ekspertiza ka zbuluar se Mukaj është qëlluar me armë zjarri në kokë.
“Në vijim të veprimeve hetimore dhe procedurale të kryera nga grupi hetimor i ngritur për zbardhjen e kësaj ngjarjeje dhe identifikimin e viktimës, nga këqyrja e skeletit, në pjesën e kafkës është konstatuar një vrimë tejshpuese që dyshohet se mund të jetë shkaktuar nga përdorimi i armës së zjarrit. Nga kontrolli i ushtruar në vendngjarje, nuk është gjetur gëzhojë apo predhë arme zjarri. Në cilësinë e provës materiale u gjetën dhe u sekuestruan një xhup, brenda të cilit kishte një aparat celular”, thuhet në njoftimin e bluve.
Mukaj, 29 vjeç, me banim në fshatin Starje Kolonjë, rezulton i larguar nga banesa që pas kallëzimit të bërë nga babai i tij, më datë 10.11.2021, pranë Komisariatit të Policisë Kolonjë.
Pas kryerjes së veprimeve të para hetimore, mbetjet kockore do të dërgohen në morgun e Institutit të Mjekësisë Ligjore Tiranë, ku do t’i nënshtrohen ekzaminimeve përkatëse, ndërsa materialet i kaluan Prokurorisë pranë Gjykatës së Shkallës së Parë Korçë, për veprime të mëtejshme, për veprën penale “Vrasja me paramendim”, mbyllet njoftimi i bluve.
Lexo edhe:
“Isha në polici, më thanë nipin e kanë vrarë”/ Deklarata e xhaxhait të Sherif Mukajt
