Është mbajtur seanca gjyqësore ndaj shtetasit Hysen Pici e është caktuar masa e sigurisë “arrest me burg” ndaj tij.
Pici ka aksidentuar me dashje një efektiv të policisë ditën e enjte, duke refuzuar të ndalojë para parullës policore në lagjen numër 1 të qytetit bregdetar.
Ai u kap duke ecur me shpejtësi në kundërvajtje me automjetin e tij.
Pici ka thënë ndër të tjera në gjykatë se nuk ka pasur si qëllim që të godasë efektivin, por se çdo gjë e ka bërë në gjaknxehtësi e sipër.
“Më vjen shumë keq për gjithçka ndodhi. E di që bëra gabim që u futa kundravajtje, por s’kishte makina dhe mendova t’i bija shkurt. Në këtë moment më doli policia përpara. Më kapi paniku sepse kisha armë me vete dhe tentova të largohesha me qëllim mos të më kapnin me pistoletë.
Më vjen keq edhe për efektivin e lënduar, nuk doja ta godisja. Kam qenë vetëm në makinë”, ka thënë Pici gjatë dëshmisë së dhënë në komisariat.
