Qeveria “Rama” i jep me qira 1 euro për 20 vjet shoqërisë “Rozafa” të biznesmenit Gjergj Luca rreth 5 mijë metra katrorë ndërtesë në ish-Kombinatin e Sheqerit në Maliq.
Vendimi është marrë në mbledhjen e Kabinetit të Ministrave të enjten e kësaj jave.
Prej vitit 2015, Luca ka fituar edhe 5 kontrata të tjera qiraje me vlerë 1 euro objekte e troje publike, për një sipërfaqe totale prej rreth 100 mijë metra katrorë, në zonën e Elbasanit, Gramshit e Prrenjasit.
Pronari i “Rozafës”, Gjergj Luca, njihet për lidhjet e ngushta me kryeministrin Edi Rama. Luca është një prej mbështetësve më të fuqishëm publik të projektit të shumë-debatuar politiko-ekonomik, “Ballkani i Hapur”.
Në dhjetor 2021, gjatë një takimi në kuadër të këtij projekti, kryeministri Edi Rama e ftoi homologun e tij serb, Aleksandër Vuçiç, për një drekë zyrtare pikërisht në restorantin e peshkut të Gjergj Lucës në Elbasan.
Të pranishëm në atë drekë luksoze tregojnë se Vuçiç mbeti shumë i kënaqur nga mikpritja në restorantin e Lucës. Mesa duket, kënaqësia që ka fituar kryeministri serb, e ka nxitur Edi Ramën që ta shpërblejë biznesmenin e “Rozafës” me mijëra metra katrorë të tjerë pronë publike, nëpërmjet qirasë simbolike vetëm 1 euro. Vendimi qeveritar detyron Bashkinë e Maliqit që të nënshkruajë kontratën e qirasë me shoqërinë “Rozafa” shpk dhe ajo pritet të marrë fuqi ligjore pas publikimit në Fletore Zyrtare.
/Syri.net/
