Aleksandër Sadikaj, me origjinë nga Berati, u vra mesditën e sotme, teksa udhëtonte me një automjet, i cili është shkatërruar si pasojë e shpërthimit.
Automjeti ku ndodhej viktima shpërtheu nga një lëndë plasëse e telekomanduar, ndërsa Sadikaj, 27 vjeç, ka dalë nga mjeti pa gjymtyrë, për shkak të shpërthimit. Ai humbi jetën në spital pëër shkak të plagëve të marra.
Nga hetimet paraprake rezulton se në automjet ishte vendosur një sasi e madhe ekplozivi, i cili ka shpërthyer me telekomandë, ndaj dhe policia po shqyrton kamerat e sigurisë në zonë, pasi ka dyshime që autori ose autorët kanë qëndruar në një rreze jo më shumë se 700 metra nga shënjestra e tyre.
Lënda plesëse shpërtheu në aksin Tiranë-Elbasan, vetëm pak metra larg rrethrrotullimit që të fut në autostradën në drejtim të Elbasanit.
Mësohet se Aleksandër Sadikaj, 27 vjeç, doli me shenja jete nga makina, me njërën prej këmbëvve të prera si edhe me plagë të shumta në trup, por humbi më pas jetën në spital prej hemoragjisë.
Policia nuk ka ende një pistë hetimi, megjithatë rezulton se i riu është proceduar më parë penalisht për tentativë vrasje.
Nga të dhënat e raportuara mësohet se viktima ishte një emër i njohur për policinë, pasi dyshohej si i përfshirë në disa ngjarje, qoftë vjedhje, krime kundër personit apo narkotikët.
Ngjarjet për të cilat akuzohej
٠Më 09.04.2011 është arrestuar në Berat, pasi, së bashku me një person tjetër kanë tentuar të vjedhin në subjektin AlbTelecom-Berat;
٠Më 30.04.2011 është shpallur në kërkim nga Komisariati i Policisë Vlorë, pasi Gjykata e Vlorës i ka caktuar masën e sigurisë “Arrest në burg”, për veprën penale “Vjedhja”, kryer në bashkëpunim;
٠Më 31.05.2017 është shpallur në kërkim nga Komisariati i Policisë Nr.2 Tiranë, pasi Gjykata e Tiranës i ka caktuar masën e sigurisë “Arrest në burg”, për veprën penale “Kundërshtimi i punonjësit të rendit publik”. Më 23.08.2018, Gjykata e Tiranës e ka dënuar me 8 muaj burgim, për këtë vepër;
٠Më 29.05.2017 është shpallur në kërkim nga Komisariati i Policisë Nr.2 Tiranë për veprat penale “Goditje për shkak të detyrës”, “Mosbindja ndaj urdhrit të punonjësit të policisë së rendit publik” dhe “Kundërshtimi i punonjësit të rendit publik”;
٠Më 09.07.2019 është shpallur në kërkim nga Komisariati i Policisë Sarandë, pasi në bashkëpunim me një shtetas tjetër, gjatë një konflikti për motive të dobëta, kanë plagosur me thikë shtetasin A. D., duke i shkaktuar dëmtime serioze në trup. Më datë 30.07.2019, për këtë ngjarje, Gjykata e Sarandës i ka caktuar masën e sigurisë “Arrest në burg”, për veprën penale “Vrasja me dashje”, mbetur në tentativë.
٠Gjithashtu, për këtë shtetas, disponohen informacione në rrugë operative se kryente veprimtari kriminale edhe në fushën e narkotikëve.
