Një sasi lënde plasëse ka shpërthyer në lokalin e reperit të njohur Noizy në orët e para të së mërkurës. Lokali, i marrë me qira në zonën e plazhit, ka pësuar dëmtime, kryesisht thyerje xhamash, ndërsa policia ka nisur hetimet.
Sasia e tritolit që ka shpërthyer llogaritet të jetë rreth 150-200 gram. Në këtë përfundim ka dal grupi i hetimit i cili ndodhet në vendin e ngjarjes, ku vijon punën për mbledhjen e provave.
I pari që është marrë në pyetje lidhur me ngjarjen ishte Noizy, i cili është pyetur nga punonjësit e policisë nëse ka probleme ose jo, dhe për kë dyshon.
Në dëshminë e tij, sipas raportimeve, Noizy ka thënë se ka probleme vetëm me reperin Cvellio, me të cilin bëri sherr dy ditë më parë, ku në një video u shfaq duke e goditur me grushte para lokalit të tij.
Ndërkohë pritet që të merret në pyetje edhe Kleviol Ahmetaj.
Policia ka sekuestruar pamjet e kamerave të sigurisë, përmes të cilave do të mund të hidhet më shumë dritë mbi ngjarjen dhe ndoshta identifikimin e autorit.
Durrës/Informacion paraprak:
Më datë 08.06.2022, rreth orës 04:24, në lagjen Nr.13, në një ambient (butik rrobash) të marrë me qira nga shtetasi B.R., ka shpërthyer një sasi lënde eksplozive.
Si pasojë ka vetëm dëme materiale.
Grupi hetimor nën drejtimin e Prokurorisë vijon hetimet për zbardhjen e ngjarjes, identifikimin e kapjen e autorit/ve.
