Neutralizohen vatrat e zjarrit në ishullin e Sazanit dhe Mirditë. Njoftimi është dhënë nga Ministria e Mbrojtjes, e cila për 3 ditë me rradhë nuk arriti të vërë nën kontroll flakët në ishullin e Sazanit, ndërsa sot falë ndihmës me një avion Canadair CL 415, i cili u ofrua si mbështetje nga Greqia, flakët e zjarrit arritën të neutralizohen.
Ajo që ra në sy ishte fakti se forcat ushtarake të angazhuara në fikjes e zjarrit në Sazan nuk kishin pajisje, ndërsa përdorën lopata dhe kova me ujë, si dhe mjete rrethanore, edhe pse kërkohej ndërhyrje nga ajri. Por duket se 4 helikopterët që zotëron FA nuk ishin në gjendje teknike për të ndihmuar në shuarjen e zjarreve.
Në operacionin për fiksjen e zjarrit në Sazan u angazhuan 122 efektivë të Forcave të Armatosura, 9 mjete, 2 anije, ndërsa mëngjesin e sotëm nisi edhe ndërhyrja nga ajri.
Ministria e Mbrojtjes thotë se situata në ishullin e Sazanit është nën kontroll, ndërsa puna vijon për të shmangur totalisht mundësinë e rindezjes së flakëve për shkak edhe të bimësisë.
Ndërkaq 54 efektivë të FA iu bashkuan forcave zjarrfikëse në aksionin për shuarjen e vatrës së zjarrit në njësinë administrative Orosh të Mirditës. Në operacionin që u finalizua në një kohë të shpejtë u bë e mundur shmangia e përhapjes së flakëve pranë banesave.
