Verën e shkuar ndodhi i fundit, por Partizani është në prag të një tjetër revolucioni. Huazimet e shumta dihej se do ta kishin një faturë dhe tani te të kuqtë po e vuajnë këtë.
Lojtarë si Mala, Albion Marku apo Sherif Kallaku erdhën në formën e huasë dhe tashmë e lënë klubin menjëherë, pa pasur shansin të luajnë në Ligën e Konferencës me të kuqtë.
Drejtuesit janë munduar t’i mbajnë, por duket thuajse e pamundur. Lokomotiva e Zagrebit ua ka shuar shpresat kryeqytetasve, veçanërisht për Albion Markun, të cilin e vlerëson plot 400 mijë euro, një shifër e paarritshme për Partizanin dhe çdo klub tjetër të Shqipëri.
Për Markun kanë pyetur edhe Kukësi e Tirana, por ka qenë e pamundur. Ndërkohë, e kalueshme është situata për Kallakun, por as mesfushori nga Fushë-Kruja nuk do të jetë në Ligën e Konferencës me Partizanin.
Më datë 15 qershor, Kallaku do të jetë nën urdhrat e trajnerit të Lokomotivës së Zagrebit dhe do të tentojë maksimumin për ta bindur të qëndrojë.
Ndërkohë, mbyllja e bashkëpunimit me Lokomotivën është një version thuajse i pamundur, pasi ai ka një kontratë të favorshme financiare. Një tjetër largim i pritshëm është Gresild Lika. Sulmuesi i ardhur nga Bylisi, megjithëse ka bërë paraqitje të mira kur është aktivizuar, nuk ka mundur të fitojë minuta.
Ai nuk preferon të vazhdojë në stol dhe megjithëse ka mundësinë për të vazhduar me Partizanin, nuk do ta bëjë. Për të ka interes nga disa klube në vendin tonë, por edhe në Kosovë.
Përveç të lartpërmendurve, emra si Zhunior, Kote, Liço, Mirosavljev apo Damçevski janë gjithashtu thuajse të larguar. Drejtuesve u lind edhe një herë tjetër puna e vështirë për të ribërë thuajse një ekip të tërë, me merkaton, që nuk ofron shumë mundësi zgjedhjeje. Tregu i huaj pritet të jetë shënjestra e të kuqve.
