Nga Boldnews.al
Kompania “Gjikuria” ka fituar statusin e “investitorit strategjik” për ndërtimin e një kompleksi turistik në Gjilekë, Himarë, të quajtur “White Roads Hotel”.
Komiteti i Investimeve Strategjike, i drejtuar nga kryeministri Edi Rama, ka marrë vendimin në 5 Prill 2022 dhe është zbardhur së fundmi.
Projekti besohet se do të përfshijë një investim në vlerë 10 milionë euro dhe statusi i është dhënë shoqërisë me emër të njëjtë me projektin, i regjistruar në Dhjetor 2020, në pronësi të kompanisë së Lorenc Gjikurisë.
Struktura turistike pritet të ndërtohet në një sipërfaqe rreth 12 mijë metra katrorë, nga e cila një e katërta është tokë private, ndërsa tre të katërtat, ose rreth 9 mijë metra katrorë, janë pronë shtetërore.
Statusi “investitor strategjik” është trofeu më i fundit në radhë për kompaninë “Gjikuria”.
Më herët, shoqëria private ka siguruar primatin e tenderave publikë të zhvilluar nga qeveria “Rama” për procesin e Rindërtimit.
Gjithashtu, “Gjikuria” ka siguruar edhe një koncesion qeveritar, atë për ndërtimin e rrugës Porti i Jahteve Orikum-Dukat, me vlerë 50.5 milionë euro.
Në verën e vitit 2021, u raportua se kompania “Gjikuria” u përfshi në një hetim penal për “ndërtim të paligjshëm”, pasi kishte nisur punimet për rrugën koncensionare pa u pajisur më parë me lejet e ndërtimit.
Nuk ka asnjë të dhënë për ecurinë e këtij hetimi në prokurorinë e Vlorës.
“Investimi strategjik”
Bazuar në vendimin 1/6 të Komitetit të Investimeve Strategjike, datë 5 Prill 2022, investimi, i cili synon ndërtimin e një resorti, që do të ketë në përbërje një hotel dhe struktura akomoduese me kapacitet total prej 150 njësish, restorante, bare, SPA etj.
Projekti parashikon të punësojë 100 persona dhe, sipas Komitetit të Investimeve Strategjike, “…është hartuar nga studio ndërkombëtare e njohur”, pa e specifikuar se cila është.
Më herët, statusin e “investitorit strategjik” e kanë fituar biznesmenë dhe personazhe pranë kryeministrit Edi Rama.
Biznesmeni Samir Mane ka siguruar dy herë statusin e “investitorit strategjik”, po aq sa edhe kompanitë e vëllezërve Dulaku.
Ky status i është dhënë edhe Artan Gaçit, bashkëshort i Ministres së Jashtme, Olta Xhaçka, si edhe gaztorit të spektakleve kabare, Gazmend Paja.
