Persona të maskuar dhe të armatosur, më 9 maj 2022, kanë grabitur një bankë të nivelit të dytë në Koplik. Policia njoftoi sot se ka arrestuar personat e dyshuar të grabitjes, madje ka gjetur edhe një nga armët që u përdor prej tyre.
Ndërkohë mediat kanë publikuar momentet e grabitjes, ku në foto shfaqet një person i maskuar që kërcënon me armë një punonjës të bankës.
Bekim Gurraj, 22 vjeç, Armir Shabaj, 25 vjeç dhe Admir Shabaj, 19 vjeç, banues në Aliaj, Malësi e Madhe janë arrestuar nga policia për këtë ngjarje.
Hetimet deri tani tregojnë se këta shtetas i kanë hedhur në ujë armët e zjarrit në vendin e quajtur “Syri i Sheganit”, degëzim i liqenit të Shkodrës.
Aktualisht është duke vijuar kontrolli nga polumbarët e RENEA-s, për të bërë të mundur gjetjen e tyre.
Deri tani, polumbarët kanë bërë të mundur gjetjen e njërës prej armëve të zjarrit, konkretisht një armë zjarri kallashnikov.
