Presidenti Ilir Meta firmos dekretin e lirimit nga detyra në ushtri të Bajram Begajt, duke i hapur rrugën zgjedhjes së tij si kreu i ri i shtetit.
Video e firmosjes së dekretit u transmetua përmes një videoje në faqen në FB të kreut aktual të shtetit, ndërsa vetë Meta ndodhet në Turqi, ku po zhvillon një vizitë zyrtare. “Presidenti i Republikës, Ilir Meta firmos dekretin për lirimin nga detyra e Shefit të Shtabit të Përgjithshëm të Forcave të Armatosura të Republikës së Shqipërisë, si dhe nxjerrjen në lirim nga shërbimi aktiv në Forcat e Armatosura, të Gjeneralmajor Bajram Rushit Begaj”, shkruhet në komentin që shoqëron pamjet.
Duke e liruar nga detyra, Meta heq dhe pengesën ligjore duke lejuar Bajram Begajn, të jetë pasardhësi i tij nëse merr sot në Kuvend të paktën 71 vota.
Nga ana tjetër, opozita është kundër kandidaturës për President të shpallur një ditë më parë nga kryeministri Edi Rama. Më herët, Berisha i kërkoi Metës të pengonte rrugën e Begajt drejt zyrës së Presidentit.
Votimi për raundin e katërt për Presidentin e ri është parashikuar të mbahet këtë të Shtunë në 18:00.
