Kryesia e Partisë Socialiste do të mblidhet sot në orën 17:00 për të diskutuar për kandidaturat për kreun e shtetit.
Kreu i grupit parlamentar socialist, Taulant Balla në një deklaratë për mediat tha se emri i presidentit të ri do të dalë nga mbledhja e kryesisë së PS.
“Tani raundin e katër e kemi ne të drejtën dhe dua t’u garantoj dhe kam bindjen e plotë që nesër në orën 18:00 , në seancën e nesërme do të zgjidhet presidenti i ri i republikës, i cili e merr detyrën më 24 korrik. Emrat e përmendur (duke iu referuar emrave që kanë qarkulluar në media) janë emra shumë të vlerësuar dhe ne nuk kemi dashur të bëjmë debat publik për emrat. Hedhja me pa të drejtë e shumë emrave nuk i bën mirë kredibilitetit të procesit. Ne do të shkojmë nesër me një emër. Nesër maksimumi brenda orës 12:00 emri do të jetë i depozituar bashkë me firmat përkatëse”, tha Balla në një prononcim për gazetarët.
Tre raundet e para për zgjedhjen e kreut të shtetit dështuan, pasi mazhoranca dhe opozita nuk dorëzuan asnjë kandidat. Në raundin që do të mbahet nesër, mazhoranca ka mundësi ta zgjedhë e vetme kreun e ri të shtetit, pasi mjaftojnë 71 vota.
