Ish-kryeministri Sali Berisha u përlot teksa mbajti fjalimin e lamtumirës për ish-Presidentin e ndjerë Bujar Nishani.
Pas homazheve të mbajtura në Presidencë, ish-Presidenti Nishani u përcoll për në banesën e fundit në Sharrë.
Aty, familjarë miq e të afërm, mes tyre edhe ish-kryeministri Sali Berisha mbajtën një fjalë lamtumire.
Në një moment, Berisha u shfaq i përlotur dhe e ndërpreu fjalën e tij.
“Jemi këtu rreth teje të përcjellim me dhimbje të madhe në udhëtimin tënd të përjetshëm të parakohshëm që nis pasi ke ngjitur si rrallëkush shkallët e jetës dhe të detyrës. Megjithëse largohesh nga ne përgjithmonë, për sa kohë ne do jetojmë do mbetesh i gjallë me veprat, finsikërinë, përkushtimin, shërbimet e çmuara ndaj Shqipërisë dhe shqiptarëve. Me ne mbetet dhe do jetojë gjithmonë Bujar Nishani, njeriu i dashur, atdhetar, shërbëtor i përkushtuar i qytetarëve, demokrat i flakët dhe guximtar, burrështetas fisnik. Sot këtu para teje ne jemi më të paktë në vete. Odeta ndihet sot më e paktë, më e trishtë se kurrë në jetën e saj për bashkëshortin fisnik që u largua para kohe. Për Ersin, Fjonën sot është dita më e dhimbshme e jetës së tyre, por ata do jenë krenarë që patën fatin të kenë një baba si ti. Për Baba Faikun sot zija është më e rëndë se toka, por ai përsëri ndihet krenar se rriti një djalë si ti që i zbardhi faqen.” Për të gjithë ne që patëm mundësi që patëm mundësi të bashkëpunojmë me ty o të mbetesh një burim frymëzimi e do të jetosh gjithnjë në kujtesën tonë. Dua të shpreh një mirënjohje të thellë për familjen tënde dhe të gjithë ata që bënë që të mos niseshe vetëm në këtë rrugë. U prehsh në paqe miku ynë i dashur. Paqja dhe zoti qofshin me ty. I lehtë të qoftë dheu”, tha Berisha në mesazhin e tij.
